Caxastur aprueba n’asamblea la fusión con Caja Cantabria y Caja de Extremadura

Caxastur dio un pasu alantre nel procesu de fusión con Caja Cantabria y Caja de Extremadura. L’asamblea de la caxa d’aforros asturiana acordó la creación d’un bancu nuevu ente les tres, al igual que la cántabra y la estremeña.
 
En concreto, lo que s’aprobó foi la constitución y integración de les tres caxes nun Sistema Institucional de Proteición (SIP), ratificando los alcuerdos de los cada ún de los conseyos d’alministración del 8 d’abril. El grupo nuevu va surdir de la tresferencia del negociu bancariu de cada caxa a un bancu que tendrá un volume d’activos de más de 53.000 millones, una presencia estatal de más de 1.400 oficines y 6.500 empleaos. Amás, cuenta con un patrimoniu netu de 2.800 millones y una lliquidez disponible de 14.500 millones, con un volume de negociu de 73.000 millones. La eficiencia bruta ye del 49 por cientu y la solvencia del 12,2 por cientu, mentes que la tasa de cobertura ye del 148 por cientu.
 
El SIP creáu pol Grupu Caxastur (qu’inclúi a CAM), Caja de Extremadura y Caja Cantabria, va desarrollase al traviés de la vía de la xestión indirecta del negociu bancariu, establecida na Llei sobre Órganos Rectores de les Caxes d’Aforru (Lorca), de tal forma que cada entidá, que mantendrá la so personalidá xurídica y la so Obra Social, segregará el so negocio como conxuntu y tresferirálo al bancu a cambiu d’una participación aicionarial nel mesmu. En total,un 66 por cientu del SIP va ser de Caxastur, un 20 por cientu de Caja de Extremadura y un 14 por cientu de Caja Cantabria.
 
El conseyu d’alministración del bancu nuevu va tar formáu por 11 miembros, de los que nueve, incluyíu’l presidente executivo, van ser dominicales y dos, independientes. De los nueve dominicales, Caxastur va escoyer cinco; Caja de Extremadura, dos; y Caja Cantabria, ún. Otra manera, los sindicatos volvieron a mostrar el so refugu al procesu de fusión de les tres caxes.