Caudalia y Bruño lleven el pegollu de los XXIX Premios Andrés Solar

El centru comercial Caudalia y la editorial Bruño van ser gallardonaos col pegollu de los XXIX Premios Andrés Solar que va entregar la XDLA en Xixón el día 21. La madreña de purpurina va recibila la empresa Paradores de Turismo.

Estos gallardones, creaos nel 1985 n’alcordanza del poeta xixonés que finara un añu enantes n’accidente de tráficu, busca premiar a la entidá o persones que rescamplaren na defensa de la llingua asturiana y poner n’evidencia a la entidá o persones que fixeren tolo contrario. Asina, entrégase’l pegollu y la madreña de purpurina, de manera respeutiva. Nesta ocasión, na vixésimonovena edición de los premios, el pegollu va ser compartíu pol centru comercial Caudalia y pola editoria Bruño. Según apunten dende la Xunta pola Defensa de la Llingua Asturiana (XDLA), la gran superficie asentada en La Vega Santuyano “vien promoviendo campañes publicitaries nestos dos últimos años onde l'asturianu ye la llingua vehicular de tol material impreso que se reparte ente los clientes”, lo que la fai merecedora del gallardón. Mentes, la empresa madrilana destacó por “la edición, distribución y promoción de la última entrega del cómic d’Astérix, ‘Astérix na tierra los Pictos’, que fixo qu’a lo llargo d'unos díes una producción cultural n'asturianu pudiera visibilizase en condiciones d’igualdá en toles llibreríes d’Asturies”.

Otra manera, el premiu negativu de los Andrés Solar d’esti añu, el madreñazu, va ser pa Paradores de Turismo, “entidá de capital público que sistemáticamente niégase a contestar tolos requerimientos fechos pa que respete la toponimia oficial nos sos establecimientos d'Asturies, como son los casos de Xixón, Courias o Cangues d’Onís”. Los trés gallardones van entregase’l sábadu 21 d’avientu, a les 19.30 hores, nel salón d’actos del Centru de Cultura Antiguu Institutu, actu nel que tamién va actuar el dúu conformáu por Mapi Quintana y Elías García. Yá de nueche, va celebrase la tradicional espicha, que repite col Canteli como sede. El so preciu ye de 20 euros y ye necesario confirmar asistencia nel teléfonu 985.229.553 o nel corréu info@xunta.org primero del miércoles.