Cataluña nun quier más térmiques

Mientres n'Asturies los proyectos de nueves centrales térmiques recíbense como maná del cielo pa la economía asturiana y naide protesta polos sos posibles efectos contaminantes nin se critica'l modelu enerxéticu qu'imponen, la sociedá catalana recela de la construcción masiva d'estes instalaciones. Ello ye qu'una comarca tan industrial como Martorell, onde tienen los sos centros de producción empreses como la Seat o Solvay, ta llevantao en pie de guerra contra'l proyectu de Gaz de France pa mangar ellí una central térmica de ciclu combinao. Anque'l conceyu de Martorell parez que ta d'alcuerdu cola térmica, 22 conceyos de la rodiada tan preparando escritos d'alegación y movilizaciones contra esta planta, y hasta'l mesmu PSC-PSOE enseña nel so web un documentu previu a les alegaciones que tamién va presentar nel que se descalifica dafechu la xustificación que se fai de la térmica. Faise difícil imaxinar que n'Asturies pasare daqué asemeyao.