Castilla-La Mancha y Asturies llideren l’incrementu de precios nos 12 meses últimos

|

La tasa interañal del Índiz de Precios al Consumu (IPC) situóse n’Asturies nun 4,1 por cientu, porcentaxe que namái supera Castilla-La Mancha, con un 4,2 por cientu. La media estatal continúa nun 3,6 por cientu.
 
Según los datos facilitaos güei pol Instituto Nacional de Estadística (INE), a estos dos territorios sigui-yos Cantabria y Castilla y Lleón, con una tasa del 3,9 por cientu. Mentes, los llugares con menos inflación nos 12 meses últimos foron les ciudaes autónomes de Ceuta (2,2 por cientu) y Melilla (2,4 por cientu), y Canarias (2,9 por cientu).
 
Otra manera, l’IPC medró en marzu n’Asturies un 0,5 por cientu en comparación col mes anterior, una cantidá que vino provocada pola xuba de los precios del vistíu y calzáu, que s’incrementaron nun 2,2 por cientu, lo que recueye'l comportamientu propiu del principiu de la temporada primavera-branu; y del tresporte, qu'aumentaron un 1,5 por cientu pol encarecimientu de lubrificantes y carburantes. Por contra, los precios de la enseñanza caltuviéronse invariables sobre'l mes anterior, mientres que baxaron los de medicina (0,1 por cientu) y l’ociu y cultura (0,9 por cientu).
 
Los territorios onde más medró l’IPC nel mes últimu foi nes ciudaes autónomes de Ceuta y Melilla, con un 1,1 por cientu; y en Navarra, con un 1 por cientu. Nel lláu contratriu tán Illes Balears (0,4 por cientu) y Asturies y La Rioja (0,5 por cientu). La media estatal foi del 0,7 por cientu.

Contador Estadistiques