Castañón: "Si quemamos carbón más allá del 2018, queremos que sía asturianu"

La candidata de Xuníos Podemos al Congresu por Asturies, Sofía Castañón, defendió que'l porvenir de les cuenques mineres pasa por dar "una solución de futuru" más allá del 2018 y pola quema del carbón autóctonu al empar de desendolcu d'un plan de transición enerxética. Podemos, IX y PP desmarcáronse del frente común pol mineral.

Nun almuerzu informativu colos medios celebráu esta mañana, na café-llibrería xixonesa La Revoltosa, Castañón trató dellos asuntos d'actualidá y sobre les eleiciones del 26 de xunu, ente los que taba'l tema del carbón. Ayeri, patronal, sindicatos, los gobiernos d'Asturies, Aragón, Castilla y Lleón y Castilla-La Mancha, y partíos políticos, ente los que taben el PSOE, Foro, Ciudadanos, PAR o Chunta Aragonesista, roblaron en Madrid un Acuerdu en Defensa de la Minería del Carbón y les Zones Mineres que nun sofiten IX, que tuvo presente nel actu, nin Podemos nin PP, que nin siquiera acudieron.

L'oxetivu del mesmu ye facer un frente común pa esixir al Gobiernu entrante que garantice la continuidá de la minería nel Estáu más allá del 2018, fecha na que zarrarán toles esplotaciones por mandáu de la Xunión Europea. Al ser entrugada al respeuto, Castañón afirmó que'l futuru d'actividá minera más allá del 2018 pasa "por protexer el nuesu carbón" y que "l'acuerdu de Carbunión asume esi zarru de les mines; nosotres apostamos por una pervivencia, que siempre qu'haya que quemar carbón queremos que sía asturianu", al empar que se desendolque "un plan de transición enerxética que sía sostenible".

"Agora mesmo defender la minería ye da-y una solución de futuru más allá del 2018", continuó, pa depués afirmar que "vemos fundamental facer una auditoría independiente de lo que qu'ocurrió con toles ayudes de los fondos mineros. Tamos falando de más de 20.000 millones d'euros; necesitamos saber qué foi de la so xestión". D'igual forma, reclama al Gobiernu estatal "la deuda de 213 millones d'euros qu'afeuta direutamente a Asturies". Pa finar esti asuntu, definió a los firmantes del acuerdu de Madrid como "los sepultureros del carbón".

Frente común por Asturies

Nuna entruga plantegada por Asturies.com sobre si ye posible entamar un frente común de diputaos asturianos nel Congresu, afirmó que pela so parte nun ye problema siempre y cuando les otres fuercies tengan la mesma visión y forma de solucionar los problemes d'Asturies. "Hai cuestiones nes que coincidimos, pero tamién tenemos maneres diferentes d'enfrentar los retos d'Asturies", señaló.

"Ser d'Asturies nun garantiza que tengamos la mesma manera de defender a Asturies", añadió, "pero tamién vemos otres coincidencies, na esperencia de la undécima llexislatura, como col PSOE pa defender la UTE de Villabona". Casu que nun se dio con Foro a la hora de defender el sector llacteu, apuntó.

Otra manera, Castañón destacó l'enfotu de Xuníos Podemos "por feminizar la política" y afirmó que l'oxetivu de la coalición eleutoral con Izquierda Xunida, ente otres fuercies, "ye ganar".