Castañón, candidata de Podemos n’Asturies

|

La escritora Sofía Castañón va encabezar la llista de Podemos n’Asturies, que se presenta nel territoriu coles sos sigles, mientres que’l númberu 2 va ser Segundo González García. La redaición del programa estatal en materia llingüística faise dende’l país.

El de Castañón yera’l nome que se prevía dende les primaries celebraes en xunetu, cuando participó na llista presentada pol equipu de Pablo Iglesias, superando a les alternatives nacíes n’Asturies (Asturies Decide), Andalucía (Utopía y Dignidad) y Aragón (Bases de Aragón). La política d’incorporación de fichaxes non militantes de la formación nes candidatures nel mes últimu, como asocedió col xeneral Julio Rodríguez, ex xefe del Estáu Mayor de la Defensa (JEMAD), que va de númberu 2 por Zaragoza, o con Juantxo López de Uralde, númberu 1 por Araba, tres l’alcuerdu con Equo, nun alcanza al país, polo que la escritora y realizadora va encabezar la llista al Congresu de Podemos n’Asturies.

Nun videu colgáu na cuenta de Twitter oficial del partíu, la xixonesa señala que “doy este paso con mi crío en el regazo porque es una responsabilidad; porque quiero que tenga un futuro en Asturies, que crezca en Asturies, y no sólo por él: por todos los críos y todes les críes que todos y todas tenemos en el regazo”. Va acompañala na llista como númberu 2, l’ayandés Segundo González García. Mientres, pal Senáu, Podemos presenta a la uviedina Jara González Villanueva.

Nun hai coalición

El vienres acabó’l plazu pa presentar coaliciones electorales nes circunscripciones de tol Estáu, polo que Podemos “va tar n’Asturies presente nes eleiciones cola so imaxen y les sos sigles”, comunicó Xuacu Rodríguez Morón, miembu del Conseyu Estatal de la formación, a Asturies.com. Hai que recordar que n’otros territorios Podemos va en coalición con otres organizaciones, como en Galicia (con Anova y Esquerda Unida na candidatura ‘En Marea’), Catalunya (con Barcelona en Comú, ICV y EUiA en ‘En Comú Podem’) y la Comunitat Valenciana (con Compromís en ‘Compromís-Podemos. És el moment’).

No que toca al programa, el representante de Podemos señaló que la idea de la organización n’Asturies  ye tener un “programa asturianu” que los candidatos se comprometen a defender en Madrid, pa lo que se punxo en marcha dende’l país la iniciativa de los ‘Parlamentos de la xente’, “onde queremos recoyer  propuestes que seyan un compromisu firme de los candidatos y candidates que s’escueyan por Asturies”. Sicasí, “la xente de Podemos Asturies ta interviniendo nel programa estatal y de fechu la redaición del programa estatal n’aspectos importantes, como nel llingüísticu, sal d'Asturies”, afirmó Rodríguez Morón.

Contador Estadistiques