Casimiro Fernández asturianiza’l Far West na novela ‘Fort Paniceiros’

Una historia de vaqueros ambientada en California enllena de referencies a Asturies. Ye lo que plantega Casimiro Fernández, escritor que s’estrena a los 72 años, en ‘Fort Paniceiros. Una historia de la de mi’ madre’, primer títulu de la coleición ‘Al filu’ d’Ediciones Radagast.

“Hai de too: xérif, foraxíos, güisqui, plantes rodadores, saloon con música y munches pistoles, tiros y hosties”, resume Fernández, mierense retornáu depués d’emigrar a México. Ye un ‘fabada western’, como etiqueta la editorial, con vaqueros que comen esti platu tan carauterísticu de la nuesa gastronomía, un pueblu asturmexicanu que mez les ‘tortillas’ y los tortos, y hasta ranchotonaes.

Una novela que, en definitiva, recueye tolos clixés del xéneru del oeste pa da-yos una vuelta con un humor “un pocu pacón” que, apunten dende Radagast, recuerda en muncho al programa ‘Terapia de Grupo’ qu’emitiera TPA. L’autor apunta que siempre-y prestaron “eses novelines del oeste nes qu’había tiros y hosties a mamplén” y que nesta ocasión fixo lo mesmu pero “con dalguna nota d’humor”, y añade qu’otra de les motivaciones que lu llevaron a escribir ‘Fort Paniceiros’ ye que considera que hai munches noveles n’asturianu “onde nun pasa nada”.

Con esta obra con toques ucrónicos Radagast inaugura la coleición ‘Al Filu’, na que van entrar toles obres de la editorial que “raspien” la fantasía, la ciencia ficción y el terror, na que ta especializada, pero que nun lleguen a ser plenamente “de xéneru”.