Casado tresllada a l’ALLA’l so respetu y consideración dafechu pa col asturianu

|
Pablo Casado

El presidente del PP, Pablo Casado, respondió a la carta unviada por Xosé Antón González Riaño, presidente de l’ALLA, depués d’unes declaraciones nes qu’afirmaba que naide nun falaba’l “bable” n’Asturies. Esti vienres llegó la contestación del popular, que tresllada’l so respetu y consideración pa cola llingua asturiana.

Na mesma, según comunica l’Academia de la Llingua Asturiana (ALLA), tamién afirma qu’él tien el deber de defender los derechos llingüísticos de tolos españoles y que la pluralidá llingüística de les comunidaes autónomes ye un patrimoniu cultural qu’hai que caltener, pero ensin amenorgar la realidá del español como llingua común. La institución académica “valora que’l tonu y el sentíu constructivu d’esta respuesta fairía posible agora l’aconceyamientu que’l presidente de l’ALLA reclamaba al dirixente del PP p’afondar sobre la problemática llingüística y cultural d’Asturies”, polo que González Riaño “reitera’l brinde a Pablo Casado pa caltener una xunta nel so llar d’Uviéu con motivu d’una de les sos próximes visites al Principáu”.

El 12 de payares, en plena precampaña poles eleiciones andaluces, Casado dirixóse a la presidenta Susana Díaz pa pidi-y esplicaciones pol fechu de “que su partido esté imponiendo el eusquera en La Rioja; o esté imponiendo el catalán en Aragón; o esté imponiendo el bable, que nadie habla, en Asturias. Me gustaría obtener esa respuesta”. Estes declaraciones provocaron una rápida contestación nel país, faciendo que la etiqueta #FálaseAsturianu fora primer tendencia en tol Estáu en Twitter, llegando a más de 5 millones d’usuarios xunto con #YoFaloAsturianu.

Contador Estadistiques