Carrio y Soto recuperen les sos nueches celtes

La del conceyu d'Ayer llevaba ensin celebrase 15 años mientres que la de Llaviana torna llueu del parón pola pandemia de COVID-19.

Carrio ta celebrando les sos fiestes de Los Remedios, cola so Nueche Folk como gran atractivu. Va tener llugar esta nueche a les 23 hores la so decimoter edición, que va contar cola presencia d'Ambás y Ramsés –que van poner un taller de baille tradicional a les 21.30 hores–, La Curuxa, L'Andecha Turcipié y La Garrapiella.

Si especial ye la vuelta nesti llugar de Llaviana, más lo ye en Soto, onde nun se celebra la Nueche Celta dende l'añu 2007 pola falta d'apoyu municipal. Mañana, 15 años depués, recupérase esta folixa nacida nel 1996 y col mesmu carte que naquella edición: Felpeyu (00.30 hores), Llan de Cubel (2 hores) y Dixebra (3.30 hores), cola participación tamién de la Banda Gaites El Gumial (23 hores).

Amás, pela tarde, a les 17.30 hores, va tener llugar el Concursu de Bandes de Gaites Valles d'Ayer, y a les 20 hores baille tradicional con Les Ayalgues d'Ayer y Folklor Ayerán. Los asistentes a esta folixa van a tener a la so disposición autocares de día y de nueche dende y contra Uviéu, Mieres, Morea, Cabanquinta, Felechosa y La Pola Llaviana.