Carrio entama la VII Nueche Folk

La Kuruxa 2-0, Vrienden y Spanta la Xente conformen el cartelu de la VII Nueche Folk de Carrio. La Camocha, La Pola Siero y Veiga tamién acueyen actuaciones musicales destacaes.

Los conciertos nesta población llavianesa van principiar a les 22.30 hores d'esta nueche cola baxa d'última hora de Skontra por motivos llaborales imprevistos d'un miembru d'esta banda. Vrienden van ser los sustitutos de la formación de punk-folk pa formar un cartelu igual de destacáu xunto con La Kuruxa 2.0 y Spanta la Xente. Sicasí, Skontra sí anuncia la so presencia mañana en Balboa (El Bierzu) dientro de los conciertos del festival Vibra Balboa, onde los asturianos comparten escenariu con Boss&Over, Pan de Capazo y DJ Ángel Plur.

Skama la Rede tien una dobla cita esta fin de selmana, con una primer actuación esta nueche, a partir de les 23 hores, nes fiestes del barriu xixonés de La Camocha, pa siguir depués cola folixa cola discomóvil BKV. Mentes, mañana va tar presente nos II Alcuentros Alternativos y Populares de Bimenes xunto con ’El Drogas y la (Des)Memoria Band, La Tarrancha, Arma X y Fran Rubio, y de Dani Antistailo. Otra manera, güei a les 19.30 hores, va tener llugar un conciertu contra'l 'Principado' entamáu por Nora Antifa nel que participen los vascos Blood as Ink y los asturianos Estáu d'Escepción, Bad Cream y Expropiazión. El llugar ye'l Llar El Mataderu y la entrada, de 3 euros.

Tamién va sentise música n'asturianu mañana en Veiga nel Unirock, festival de baldre nel que van a tomar parte Lycosa Tarántula (21 hores), Misiva (22 hores), Westhia (23 hores), Desakato (00.10 hores) y Escuela de Odio (1.45 hores).