Carrio abre les sos fiestes cola celebración de la IV Nueche Celta

Héctor Braga y Anabel Santiago, La Bandina la Curuxa, Duerna y Skama la Rede conformen el cartel d’esti añu de la Nueche Celta de Carrio. Esti eventu ye ún de los más esperaos de les fiestes d’esta población llavianesa.
 
L’actividá de la xornada va principiar a les 20 hores cola llectura del pregón, a cargu de Xurde Morán, que va dar aniciu a cinco díes de fiestes en Carrio. Pa les 23 hores ta previsto l’entamu de la IV Nueche Celta de Carrio, que van abrir dos artistes de calidá contrastada col so espectáculu conxuntu: Héctor Braga y Anabel Santiago. Darréu, la Bandina la Curuxa, que repiten del añu pasáu, van xubise al escenariu pa ufrir el so repertoriu baillable que nun va dexar a nadie paráu nel prau.
 
Los terceros n’actuar van ser los componentes d’otru grupu que yá tuvieron nel 2010 na Nueche Celta de Carrio, Duerna, anque nesta ocasión vienen con discu nuevu baxo’l brazu: ‘Manca la maera’. Por últimu, pa pesllar la folixa, va xubise al escenariu Skama la Rede, grupu ganador del Premiu al Meyor Cantar 2011 por ‘Condenáu’ que ta preparando la defensa d’esti tema’l 19 de payares en Friûl nel Festival Liet Internacional, que nesta ocasión va celebrase na ciudá d’Udin/Udine.