Carreteres asegura que les obres del enllaz de Lieres cumplen cola declaración d’impactu ambiental

|

La Direición Xeneral de Carreteres retrucó a les acusaciones de la Coordinadora Ecoloxista sobre afeiciones medioambientales posibles nes obres del enllaz de Lieres. El Gobiernu asegura que cumplen cola declaración d’impactu.
 
Según comunicó güei Carreteres a Europa Press, les obres que tán faciéndose en Lieres pa xunir el corredor del Nalón cola autovía Uviéu-Villaviciosa al traviés de la ‘Y’ de Bimenes “tán desarrollandose conforme a lo recoyíu y aprobáu na declaración d’impactu ambiental”. Sobres les acusaciones sobre afeiciones mediambientales que la Coordinadora Ecoloxista d’Asturies comprobó in situ, dende’l Gobiernu señalaron que la valtada d’árboles tien los permisos necesarios y que la turbieza del agua del ríu Nora nun ye productu de les obres. “De forma regular faense análisis de turbieza nel ríu, agües arriba de la obra y agües abaxo, y constatóse que la turbieza ye mayor agües arriba, en zones nun afectaes pola obra, polo que se deduz que nun ye por mor de la obra del enllaz”, apuntaron dende Carreteres.
 
Por último, recordaron qu’ente les midíes correctores d’impactu ambiental va facese la restauración completa de los márxenes del ríu.

Contador Estadistiques