Carreteres abre al tráficu’l primer tramu de la ‘Y’ de Bimenes

Esta mañana, a les 8 hores, entró en serviciu’l primer tramu de la conocida popularmente como ‘Y’ de Bimenes. Ésti xune Pumarabín col Altu El Corvero, tien un llargor de 4.291 metros y permite aforrar seis minutos.
 
L’exe de conexión nuevu ente’l Corredor del Nalón y l’Autovía del Cantábricu, que provocó un gran malestar vecinal y la oposición de coleutivos ecoloxistes, ye una vía rápida de dos carriles que ta executándose en cincos tramos. El que la Direición Xeneral de Carreteres abre güei ye’l primeru d’ellos y alcuéntrase na so totalidá nel conceyu de Samartín del Rei Aurelio: principia na zona de Pumarabín –dende’l corredor del Nalón pola carretera SM-5, llega al enllaz actual en L’Entregu– y termina nel Altu El Corvero, onde conecta cola carretera AS-338, que va de L’Entregu a Bimenes.
 
Les obres de la fase I, executaes pola la xunión temporal d’empreses constituida por FCC Construcción y Alvargonzález Contratas, taben presupuestaes en casi 20,9 millones d’euros, anque finalmente tuvo qu'ampliase’l gastu en más de 11 millones por poblemes na estabilización del terrén. La inversión pa executar la totalidá de la ‘Y’ de Bimenes ye de 174,8 millones d’euros, financiaos en gran parte con cargo al Plan de la Minería del Carbón.