Carreño refugó unes ordenances de normalización del asturianu nuna votación na que foi clave l’abstención del conceyal d’URAS

El plenu del Conceyu de Carreño refugó ayeri l'aprobación d'unes ordenances d'oficialidá que presentare'l conceyal de la formación nacionalista Andecha Astur Santiago Artime. Na votación final en plenu, los votos en contra de PP y PSOE, que sumen 8 conceyales, opusíeronse a los votos a favor del documentu de los 8 conceyales de UICA, Andecha Astur y Izquierda Xunida. L'abstención del conceyal d'URAS Joaquín Rodríguez forzó una segunda votación na que'l votu de calidá del alcalde Ángel Riego (PSOE) entornó la decisión definitivamente del llau del "non".

El documentu d'ordenances refugáu pol plenu, presentaba a lo llargo de cinco fueyes una riestra de midíes pa garantizar el billingüísmu nel conceyu, como'l derechu de los sos habitantes a mandase n'asturianu a l'alministración o la normalización del usu del asturianu dientro de la casa conceyu y el conocimientu progresivu de la llingua por parte de los funcionarios, ello xunto a unes midíes de promoción activa del asturianu a entamar por parte de l'alministración, ente elles la rotulación na toponimia tradicional o la convocatoria de concursos y certámenes nos que se potenciare l'usu del asturianu.

Andecha Astur entamare a mover esti documentu de la ordenanza nel añu 2003 cola intencion de que los grupos políticos lu estudiaren pa poder aprobala a lo llargo de la llexislatura. Dende mediaos del 2006, considerando que los partíos tuvieren tiempu abondu pa estudiar el documentu, el conceyal d'AA solicitó'l so inxerimientu na Comisión de Cultura del Conceyu, un trámite que s'espurrió nel tiempu hasta esti mesmu mes de febreru por causes que pa la formación nacioalista débense en gran parte a enzancos puestos polos grupos opuestos al documentu. Coles ordenances yá en Comisión, los grupos de PP y PSOE manifestaron dende un entamu la so postura contraria a les mesmes, argumentando'l PSOE qu'aprobales supondría una imposición y llevaría arreyao un altu coste que fadría precisos unos presupuestos nuevos pal conceyu. El conceyal d'AA Santiago Artime, que calificó de "ensin sentíu" estes argumentaciones, esplicó a Asturies.com como se punxo en contactu colos servicios técnicos del conceyu, que-y confirmaron que nun recibieren consulta nenguna de los representantes socialistes sobre esti particular.

Artime llamentó que'l PSOE s'encerriscare en postures contraries al asturianu dando cada vegada escuses diferentes nun discursu que "va quince años teníase na existencia de 1000 bables y agora na imposición y la escusa del coste, que nun tien razón de ser en cuantes qu'otros conceyos apliquen estes polítiques ensin que-yos supongan un marafundiu". Sicasí, Artime foi especialmente críticu cola postura del actual conceyal de la URAS y candidatu proclamáu a alcalde pola coalición "Unión Asturianista" qu'amiesta a la mesma URAS y al Partíu Asturianista. Pal conceyal d'AA, que recordó que'l mesmu Joaquín Rodríguez apaeciere al día dempués de ser proclamáu candidatu pidiendo la oficialidá del asturianu nuna entrevista a un periódicu asturianu, resulta "incomprensible" como "una coalición que quier facese cola representación del asturianismu entama a incumplir les sos promeses incluso enantes de les mesmes elecciones".