Carreño afina les gaites pa vivir el Villa de Candás

|
Cartelu XXII Festival de Bandes de Gaites Villa de Candás

Agrupaciones d’Asturies, Breizh y Portugal van participar nel XXII Festival de Bandes de Gaites Villa de Candás, que va celebrase del xueves al domingu. Tamién va haber espaciu pa conciertos de música folk, destacando la presencia de N’Arba.

Mañana, a les 18.15, la Banda de Gaites Candás, organizadora d’esti certame, va abrir el festival con un pasucais y una actuación na plaza los Hermanos Helio, onde va tar asitiáu’l mercáu tradicional. Será la primera de les actuaciones de les cuatro bandes de gaites que van participar nesta ocasión: Fonte Fuécara, de Llanera; São Tiago de Cardielos, de Portugal; y l’Ar Melhioù Glaz, de Breizh.

Toes elles van actuar nel actu central de la cita previstu pal sábadu a les 23 hores en Les Conserveres. Enantes, y a lo llargo del vienres y el sábadu, van tomar parte en dellos pasucais pela villa, asina como nel desfile previstu pa les 22.45 hores dende la plaza los Hermanos Helio.

Los escolinos de la Banda Gaites Candás tamién van tener güecu nel festival, con un pasucais a les 18.30 hores de vienres. Una hora más tarde va ser el turnu de l’agrupación bretona, mentes que la portuguesa va actuar el sábadu a les 13.30 hores.

Pal domingu tán previstos el V Concursu de Cuerpos de Percusión Villa de Candás, a les 13.30 hores en La Baragaña, y el V Concursu de Pareyes de Gaita y Tambor Villa de Candás Memoria Diego Alonso, nel mesmu llugar a les 18 hores. Los dotación de los premios ye esti añu mayor gracies a una aportación económica del Conceyu de Carreño.

Cuatro conciertos

Dientro del Festival de Bandes de Gaites Villa de Candás tamién hai espaciu pa la música folk. Nesta ocasión van celebrase cuatro conciertos, destacando l’actuación de N’Arba, grupu históricu de la escena musical asturiana que s’axunta mui de xemes en cuando.

L’actuación de la banda de Xosé Antón Fernández ‘Ambás’ va ser na madrugada del vienres al sábadu a la 1 en La Baragaña, depués de la de La Curuxa, prevista pa les 23.30 hores. Darréu va haber escenariu llibre p’allargar la folixa hasta bien entrada la nueche.

El sábadu va ser el turnu, tamién a la 1, de Salón Bombé, mentes que’l domingu va repetir La Curuxa a les 20.30 hores. Completa los conciertos del festival La Talambera, que va ufrir el vienres a les 13 hores un pasucais ente Hermanos Helio y La Baragaña, con actuación final nesta plaza.

Contador Estadistiques