Carlos Suari y Berto García publiquen "Treslallende"

Carlos Suari y Berto García, dos de los poetes más mozos de l panorama lliterariu asturianu, presenten esta selmana'l so llibru conxuntu de poemes "treslallende", estoyu de poemes escritos dende la emigración y dende la condición de "lleendes urbanes". Editáu pola casa "trabe" el llibru amuesa "dos visiones poétiques de la fuxida forzosa, del dolor que significa pa ellos dexar atrás l'alma qu'alluma los caminos, pa ganase la vida nel ermu ayenu" nes palabres del tamién escritor Xulio Vixil, que define la obra d'estos dos autores como "l'esiliu modernu de los que nun esisten".

Xulio Vixil esplica que tres del títulu xenéricu de la obra "escuéndense dos poemarios, con dos autores y dos mundos, pero un mesmu esiliu, el qu'obliga a la mocedá d'Asturies a marchar del so país siendo invisibles, siendo esiliaos inesistentes. Nesti casu, Berto García y Carlos Suari amósenmos dos visiones poétiques de la fuxida forzosa, del dolor que significa pa ellos dexar atrás l'alma qu'alluma los caminos, pa ganase la vida nel ermu ayenu". Nel casu de Berto García esa situación esprésase nuna poesía "desnuda de cristal tallao y tresparente", destacando'l poema "nel andén del inviernu que fala del "Colar pensando en volver, per aciu d'un viaxe non deseyáu, onde les pallabres foriates recuérden-y el dolor de tar lloñe; onde solo queda saborguiar el tastu de l'alcordanza, mientres percuerre los quilómetros buscando feches pal regresu; onde solo queda buscase a ún mesmu na diáspora, esperando'l día de nun tener que marchar. Y too, a cinco díes de señaldá, cola maleta enllena de nada". De lo de Carlos Suari, Vixil destaca'l poema "Cualesquier ciudá ye ermu" un poema nel que Suari "a ritmu de tren, nel so viaxe metálicu y na so poesía enllena d'ausencia y de vienres que nun lleguen, preséntase énte esta patria ingrata como un poeta sólidu" qu'ofrez "Cartografíes imposibles d'una patria negada y pacetible, na distancia imposible d'imposibles coordenaes".

Berto García (31 años, Les Vegues, Corvera) ye autor d'Ensin otra sida (Trabe, 2005) y de mui bien d'obra publicao nes revistes de lliteratura del nuesu país, casu d'Entellunu, El Canciu'l Cuélebre, Lletres Asturianes y Reciella Malory. Mayestru de profesión, trabaya como interín anguaño nuna escuela de Castiella y ye miembru de la Banda de Gaites de Corvera. Pela so parte, Carlos Suari (24 años, La Xuncarosa, Avilés) ye autor del poemariu "El mio cachu tírolu" publicáu n'internet de forma llibre en 2005. Llicenciáu en Ciencies de l'Actividá Física y del Deporte, estudiante d'Antropoloxía Social y Cultural y xuez y monitor de deportes tradicionales asturianos, tien tamién escrites delles publicaciones científiques sobre l'aplicación educativa de la tradición física.