Carlos Rubiera: “Queremos incrementar la presencia de Xixón nel FIMI de Lisboa pal añu que vien”

|

Xixón foi ún de los trés conceyos presentes en Lisboa nesta edición del Festival Internacional Máscara Ibérica (FIMI). L’edil Carlos Rubiera, acompañáu por Xosé Nel Riesgo, afitó rellaciones con Progestur, organizadora del certame.

¿Qué-y paeció’l FIMI?

El festival ye una apueste mui intelixente por parte de Progestur. Da la sensación de que yá ye una muestra consolidada en Lisboa y tien una repercusión importante, non sólo na ciudá, sinó tamién en tolo que ye l’ámbitu ibéricu y inclusive internacional, como amuesa la presencia d’un grupu de Bulgaria.

Según la organización, hasta’l domingu pela mañana’l públicu participante ascendía a 300.000 persones.

Ye un aciertu total tar presentes equí. Nós, dende Xixón, queremos incrementar la nuesa presencia l’añu que vien con un stand yá en condiciones; con una muestra potente. Amás, equí fiximos contautos con otros conceyos asturianos de cara al Festival Arcu Atlánticu, como Cangues d’Onís –con Siero yá lo teníemos–, y afondemos muncho la rellación cola xente de Progestur. Hai en marcha proyeutos interesantes de cara al futuru.

¿Va collaborar otra vuelta Progestur nel Festival Arcu Atlánticu?

Sí, el direutor de Progestur, Hélder Ferreira, yá mos dixo que diba a venir a finales de mes a zarrar tolos detalles. Va haber una representación portuguesa similar a la del añu pasáu, tanto a nivel comercial como artística, no que tamos trabayando agora. Tamién vamos contar con representación institucional al traviés de la empresa de turismu EGEAC. Creo que l’oxetivu d’aniciu de Xixón col Festival Arcu Atlánticu, que yera dir entamando una rede de rellaciones institucionales y culturales, pero tamién d’intercambios comerciales coles ciudaes del arcu atlánticu, ta viéndose que yera una apueste correcha y que taba bien plantegada.

Esti añu la edición del certame xixonés va tar dedicada a Naunnt/Nantes. ¿Cómo van los preparativos de la presencia d’esta ciudá de la Breizh histórica en Xixón?

Tán dalgo atrasaos por delles circunstancies, sobre manera’l retrasu n’aprobación de presupuestos, que fixo que fuéramos a Nantes tamién con más retrasu de lo deseao. Tán zarrándose coses dende los departamentos diferentes, pero va pasar como asocedió con Portugal l’añu pasáu: el festival va ser un aniciu d’una rellación que va dir creciendo inevitablemente. L’otru día tuvo con nós el presidente de la Conferencia de les Ciudaes del Arcu Atlánticu, Charles Nicol, contemos-y sobre planos y proyeutos concretos lo que ye la idea del Festival Arcu Atlánticu y quedó entusiasmáu. Comentónos que diba colgar esa información na páxina web de la propia organización.

Per otru llau, yá tenemos confirmada la presencia de los cinco conceyos asturianos que foron convidaos, esto ye, los trés controcios con Xixón, Carreño, Siero y Villaviciosa, y ún del oriente y otru del occidente, Ribeseya y Valdés, de manera respeutiva. El martes va facese la firma de los convenios de collaboración nel Ayuntamientu de Xixón, y puedo adelantar que yá tenemos otros conceyos picando a la puerta pa l’añu que vien, como pue ser Nava o Cangues d’Onís. Tamos falando de la segunda edición d’un festival y creo que les coses van francamente bien.

La idea ye abrir el Festival Arcu Atlánticu a toda Asturies.

Dende siempre la idea foi que’l Festival Arcu Atlánticu en Xixón tenía que ser un escaparate pa toda Asturies, non facer un festival sólo de Xixón. Ésa ye l’apueste y yo creo que yera correcha. La rempuesta de los ayuntamientos ye estraordinaria, yá que se sumen con entusiasmu y ven la idea de manera nidia, ensin nengún remilgu, lo que contrasta dafechu coles posiciones de la oposición municipal en Xixón. Izquierda Unida y el PSOE posicionáronse totalmente escontra y el PP d’una manera ambigua, inclusive diendo al recorte presupuestariu, pero la realidá desmiente cualquier dulda en rellación a lo que ye l’apueste del festival. El Festival Arcu Atlánticu ye una apuesta mui importante pal futuru de Xixón y d’Asturies.

¿En qué va consistir esa collaboración?

La collaboración va dir afitándose nos años próximos, pero esti añu va concretase na instalación d’un stand permanente y la celebración d’un ‘Día de’ dedicáu a cada conceyu. Nesa xornada, ellos van facer una programación especial, col so stand como centru d’atención del festival esi día, y va entamase un ‘Bus del Arcu Atlánticu’ d’época, de los años 70, que, en día diferente al día del conceyu, va facer un percorríu turísticu a esos conceyos con un programa especial fechu pol propiu ayuntamientu. Amás va haber actos nos propios nos conceyos baxo’l paragües del Festival Arcu Atlánticu. Una amuesa del entusiasmu qu’amuesen los conceyos ye que Valdés, pola so propia iniciativa, va incluyir dientro del programa del festival la Fiesta Vaqueira d’Aristébano, lo que pa nós foi toda una sorpresa.

Na semeya, Rubiera y Riesgo na terminal 2 del Aeropuertu de Lisboa.

 

Contador Estadistiques