Carlos Núñez, estrella de Llanes al Cubo

El gaiteru gallegu, que tien yá cuatro discos reconocíos col éxitu comercial, ye la gran atracción d'esta nueche en Llanes al Cubo, onde tamién va poder vese la prestosa puesta n'escena del grupu del Canadá "Le Vent du Nord" y los asturianos Corquiéu.

Carlos Núñez, el gaiteru gallegu más famosu de la historia, alcuéntrase esta nueche col públicu de Llanes al Cubo. Los cuatro discos d'estudiu superventes qu'hasta agora igüen la so discografía espeyen el llabor d'un músicu que rescampla como especialista n'instrumentos de vientu, sobremanera la xiblata, instrumentu col que consiguió les meyores calificaciones nel Conservatoriu de Madrid, onde estudió. Anque'l primer discu d'estudiu de Carlos Núñez nun llegó hasta l'añu 1996, esti gran embaxador de la música gallega llevaba yá dende los años 80 amosando'l so xeitu en bien de collaboraciones y participaciones, como cuando grabó colos Chieftains nel 1989 la banda sonora de "La islla del tesoru". La formación que lu acompaña nos directos suel incluyir el bouzouki, la batería y percusiones, vigulín, curdión, baxu y guitarra.

Sicasí, la mayor sorpresa de la nueche va venir de la mano del grupu del Quebec "Le vent du nord" un cuartetu de vigulín, guitarra, zanfona y curdión que recupera lo meyor de la tradición musical del Canadá francófonu, poco conocida per equí de nun ser poles visites de los tamién quebequesos "La boutine Sourriante". El grupu promete un directu entreteníu con pieces instrumentales tradicionales y de composición propia, neto que tamién dellos cantares a capella. El grupu ta agora mesmo presentando'l so segundu trabayu discográficu, Les Amants de St.Laurent.

La parte de casa ponla'l grupu de Ribeseya Corquiéu, que sigue presentando'l so primer discu "Salia" esta vegada nun conciertu pal que'l grupu de Gema García promete sorpreses cola presencia n'escenariu de músicos convidaos especiales.