Carlos Madera definió la toponimia como “un tema fundamental“

El director xeneral de Promoción Cultural y Política Llingüística Carlos Madera, asistió ayeri a la reunión de la Xunta de Toponimia que se celebró en Colombres, capital del conceyu de Ribedeva. Madera comentó que son yá 41 los conceyos asturianos que tan tramitando o tienen resueltos yá los sos espedientes toponímicos pa recuperar los nomes tradicionales de los sos pueblos y llugares, lo que supón u 60% de los 78 conceyos d'Asturies. Diez d'estos conceyos yá tienen el preste definitivu del Gobiernu asturianu, mientres que, sigún Carlos Madera, otros siete más, que son los d'Ayer, Nava, Colunga, Ribera d'Arriba, Morcín, Riosa y Llaviana, "van tener una aprobación inminente".

Carlos Madera definió'l llabor de recuperación toponímica como "ún de los temes fundamentales de la nuestra política llingüística" y refirióse al Plan de Normalización Sociollingüística del Asturianu como "una de les banderes de les señes d'identidá" nesta llexislatura, pidiendo que la sociedá asturiana faiga un apueste por "normalizar y quitá-y carga emocional al asturianu, de manera que se convierta nún puntu d'alcuentru pa toos y non nun llugar d'enfrentamientu". Madera emponderó'l llabor de la Xunta de Toponimia, que sal "de los despachos d'Uvieu pa trabayar conceyu por conceyu con espertos locales y analizando'l nome de cada llugar en collaboración colo vecinos".

El director xeneral de Promoción Cultural adelantó que l'Alministración asturiana "ta trabayando" nún conveniu que va firmase col Ministeriu de Fomentu y que va permitir que los topónimos oficiales tradicionales d'Asturies figuren nes señales de les carreteres de la Rede Estatal que pasen per Asturies.

El director de la Oficina de Política Llingüística, Ramón d'Andrés, pela so parte, reconoció que "ye difícil dar una fecha concreta pa l'acabu del llabor na toponimia" pero dixo tar enfotáu en que d'equí al final de la llexislatura puen tar terminaos "más de la metada" de los espedientes, que d'Andrés sorrayó que s'abren siempre a petición de lo propios conceyos y que se trabaya na so redacción siempre nuna gran sintonía con ellos".