Carlos Luis Aparicio y Laura Robles, nuevos nomamientos nel executivu asturianu

El Conseyu de Gobiernu del Principáu aprobó ayeri'l nomamientu del economista Carlos Luis Aparicio Roqueiro y la conceyala d'Uvieú, Laura Robles Castro, como directores xenerales d'Economía y d'Asuntos Europeos, respectivamente. Asina lo manifestó, en rueda de prensa nel recintu ferial, la vocera del Gobiernu rexonal, Ana Rosa Migoya, al términu del conceyu del Conseyu, onde s'alcordaron otros nomamientos.

El restu de representantes que falten van nomase nel Conceyu del próxmu 31 d'agostu.

Aparicio Roqueiro ye llicenciáu n'Economía pola Universidá d'Uviéu y tien estudios de postgráu. Na actualidá trabayaba na dirección d'Estudios y Estadístiques de la Comisión Nacional del Mercáu de Valores (CNMV).

Pela so parte, Robles Castro, coceyala del Consistoriu uvieín, ye llicenciada en Derechu pola Universidá d'Uviéu. Hasta xunu del 2007 trabayó nel Gabinete de la Conseyería d'Educación y Ciencia, en concreto na Viceconseyería de Ciencia y Tecnoloxía. Ye coordinadora d'Asuntos Rexonales (Europa y Euromed) del Conseyu de la Mocedá d'España, representando a ésti na so plataforma europea, l'European Youth Forum.