Cárcaba pide xunidá p'afrontar la negociación del sistema de financiación autonómicu

La conseyera de Facienda presentó na Xunta Xeneral el so programa de gobiernu.

“El Gobiernu d'Asturies defende un modelu centráu nes necesidaes del gastu y el costu efectivu de los servicios, non na capacidá fiscal de cada territoriu”, esplicó Ana Cárcaba esta mañana na Comisión de Facienda, na qu'aseguró que l'alcuerdu de los grupos políticos va ser clave pa que'l Principáu llogre los sos oxetivos. “Asturies tien de negociar xunida; poco vamos poder defender si vamos separtaos”, alvirtió, de la que se manifestó dispuesta a caltener y reforciar les alliances con otres comunidaes.

Al so xuiciu, un bon sistema de financiación autonómicu ha dir acompañáu d’un sistema fiscal responsable, progresivu y xustu. Baxo estes premises, la conseyera señaló que nun s'arrenuncia a modificar el modelu fiscal pa sofitar midíes que favorezan el mundu rural, faigan frente al retu demográficu y impulsen actividaes innovadores.

Cárcaba apeló tamién a la voluntá de diálogu y al consensu pa sacar alantre l'otru gran retu d'esti mandatu al curtiu plazu, qu'Asturies tenga cuentes aprobaes pal 2020, pa lo que va mirar pa la izquierda. Nesti sen, señaló qu'anguaño se percibieron les consecuencies de la falta de presupuestos a nivel estatal y que'l Gobiernu nun debe tar condicionáu por esa situación: "Nun podemos dexar eses tensiones nel nuestru territoriu, porque los perxudicaos van ser los ciudadanos", añadió.

La conseyería tamién pretende ellaborar a lo llargo del mandatu una llei nueva en materia económica, financiera y presupuestaria, que sustituya al testu refundíu del Réxime Económicu y Presupuestariu del Principáu d'Asturies, que data de 1998 y quedó obsoletu, según apuntó Cárcaba.

Direición Xeneral d'Asuntos Europeos

Una de les novedaes principales n’ámbitu de xestión de la conseyería ye la creación d'una Direición Xeneral d'Asuntos Europeos, que tien ente les sos funciones reforciar la presencia de la comunidá en Bruxeles. D'esta forma, trátase de potenciar la marca Asturies, fomentar la esportación de los productos del país y promover l'atracción de capital estranxeru.

La conseyera recordó qu'anguaño yá se trabaya na planificación del marcu financieru de la Xunión Europea pal periodu 2021-2027 y insistió en que'l Gobiernu ha de tar preparáu pa velar polos sos intereses nel ámbitu comunitariu. Tamién alvirtió sobre la situación d'incertidume que s’abre de resultes del 'Brexit' y la so incidencia sobre los estaos miembros de la Xunión Europea (XE).

Asuntos Europeos va tener un calter eminentemente tresversal, con vocación de sofitu al restu de conseyeríes y ámbitos sectoriales, pa intermediar coles instituciones de la XE y consiguir una mayor contundencia nos esfuercios realizaos. “Trátase de poner Europa n'Asturies, y Asturies n'Europa”, avanzó la Cárcaba.

Otru de los cambios principales pa esta llexislatura ye l'asunción por parte de Facienda de les competencies en materia de casinos, xuegos y apuestes. Nesti sen, ún de los oxetivos va ser avanzar nel desenvolvimientu del Plan de Prevención de la Ludopatía, yá qu’Asturies se convirtió nuna referencia nesti ámbitu al ser la única comunidá autónoma que cuenta con un proyeytu d'esti tipu: “Tenemos qu'afondar na conocencia de la patoloxía y el so tratamientu pa reforciar la prevención y encarar en meyores condiciones esa adicción”, sorrayó la conseyera.