¿Carbón contra nucleares?

Poco depués de celebrase'l cabudañu de Chernobil, el debate sobre si Europa tien d'apostar poles centrales nucleares plantégase otra vuelta dende los despachos de la UE. La comisaria europea Loyola de Palacio ta empeñada en que namás la nuclear puede da-y a Europa una independencia enerxética que nun tendría con otres fuentes d'enerxía. El diariu El País recueye güei na so editorial esti debate qu'implica a tolos estaos europeos y que ta plantegándose dende la comisaría en términos d'un trágala ente cumplir col protocolo de Tokio apostando pola nuclear o nun cumplir y metese poles térmiques. Mesmamente Suecia, ún de los países más avanzaos del continente prometió en 1998 que diba trancar toles nucleares que tien y qu'aporten el 34% de la corriente que se gasta. Esta selmana súpose que nun lo tienen tan claro, y anque tienen lleis qu'impiden facer centrales nueves, de momentu tan invirtiendo munchos millones en caltener centrales yá desfasaes como la de Barseback.Anque n'Asturies nun tenemos centrales nucleares, el debate tamién llega a los nuestros políticos, esmolecíos con que l'estáu apueste pol nuclear y vaya trancando les térmiques. Luis María García, director xeneral d'industria del Principáu, entró al trapu de la comisaria, declarando que Loyola de Palacio y el PP tienen una política de "satanización del carbón" y afalen l'apueste pol nuclear de les "grandes empreses". Sicasí, na so defensa encesa de la térmica García tampoco nun escaeció dar argumentos "verdes".

Contador Estadistiques