‘L’arume de la tierra’, de Carballeira, ye la obra merecedora del VI Premiu Alfonso Iglesias

Un cómic del autor piloñés Enrique Carballeira resultó ganador del VI Premiu Alfonso Iglesias, gallardón incluyíu nos Premios Lliterarios 2014 qu’entrega la Conseyería d’Educación, Cultura y Deporte. La obra ‘L’arume de la tierra’ convenció al xuráu por unanimidá.

Ana María Fueyo, direutora xeneral de Política Llingüística, presidió’l mesmu, axuntáu ayeri y conformáu pol dibuxante Neto, l’escritor y guionista Chechu García y el téunicu en materia lingüística Luis Casteleiro. Tres aldericar sobre los trabayos presentaos, decidiéronse pol que llevaba’l nomatu de ‘Mozer’, ‘L’arume de la tierra’ de Carballeira, pol “usu de los recursos propios del llinguaxe del cómic, la calidá gráfica y el manexu de los tiempos narrativos al serviciu d'una hestoria con tresfondu actual”. D’esta forma, el piloñés recibe una recompensa de 3.000 euros.

Carballeira (L’Infiestu, 1970) ye periodista, escritor, diseñador y ilustrador que collabora con Onda Cero Radio y ‘El Comercio’. Responsable de la editorial AsturtOOns, escribió y ilustró un bon númberu de llibros pa públicu infantil, mesmo qu’obres de cómic, cuentos p’adultos y humor gráficu, ámbitu esti nel que destaca la publicación selmanal de la tira ‘Les coses de Nardo y Quina’ que vien apaeciendo de manera continuada dende va venti años nos periódicos ‘El Nora’ y ‘El Fielato’.

Tercer fallu de los Premios Lliterarios 2014

El Premiu Alfonso Iglesias de cómic ye’l tercer de los Premios Lliterarios 2014 que se falló hasta la fecha. La selmana pasa conocióse que Carlos González Espina yera merecedor del VII Premiu María Xosefa Canellada de lliteratura infantil y xuvenil pola obra ‘Cápsules de tiempu’ y que Damián Barreiro, del XX Premiu Máximo Fuertes Acevedo d’ensayu por ‘Caleya Sésamu: el papel de la televisión na tresmisión interxeneracional de la llingua’. Nos díes próximos van aconceyar los xuraos del XX Premiu Xuan María Acebal de poesía y del XXXV Premiu Xosefa Xovellanos de novela.