Carbajal recueye'l premiu de la Tertulia Malory

Por 'L'aire ente la rama' como meyor llibru n'asturianu espublizáu nel 2015.

El pub Tom Malory de L'Entregu, llugar d'alcuentru de los miembros d'esta tertulia dende hai 18 años, va ser la sede de la entrega del gallardón a la escritora Ángeles Carbajal, actu previstu pa les 17.30 hores de güei. Ésti consiste nuna ilustración d’Alfonso Zapico y una medaya d’oru conmemorativa.

El xuráu del premiu decidió fallar por 'L'aire ente la rama' pol "aciertu col qu’Ángeles Carbajal vuelve la mirada a la infancia y la tresmuta n’imáxenes d’un conteníu llíricu y emocional mui fondu, non solo como memoria del tiempu que pasó, sinón, sobre manera, como diálogu ente’l yo poéticu qu’escribe nel presente y la neña que foi". Xabiero Cayarga, con ‘La neve del cuquiellu’ (2011); Ruma Barbero, con ‘La Chelita’ (2012); Milio Rodríguez Cueto, con ‘Carne de melandru’ (2013); y Consuelo Vega, con 'Más espeso que l'agua' (2014), resultaron gallardonaos n'años anteriores.