Carabanzo acueye una edición nueva del Festival Astur-romanu

Esti vienres principia en Carabanzo’l VI Festival Astur-romanu de La Carisa. Per delantre queden trés díes nos que’l pueblu va tar tomáu por astures y romanos y nel que los visitantes van disfrutar de conciertos y munches actividaes.
 
A les 18 hores de güei, el ritual del encendíu de fueu va servir de pistoletazo al festival, que nesta primer xornada celebra’l ‘Advenimientu de les tribus astures’. Mentes, pa les 20 hores, vamos poder conocer les revelaciones del oráculu del druida Nisarius sobre’l futuru que-yos aguarda a los astures, y a les 22.30 hores disfrutar de l’actuación de La Cirigüeña.
 
Como nun podía ser d’otra manera, la folixa va continuar de madrugada con una queimada, a les 00.30 hores, y la música d’una discoteca móvil que va facer sonar la ‘Nueche del truenu’. Pa zarrar la primer xornada va tener llugar, a partir de les 3 hores, una de les novedaes principales d’esti añu nel festival: una bacanal na qu’un romanu y una romana apresaos polos astures van tener que danzar en porricu pa llevantar la moral de los soldaos.
 
El sábadu, viéspera del enfrentamientu de los dos exércitos, l’actividá va principiar al meudía cola apertura del pobláu astur y del campamento militar romanu, pa una hora más tarde celebrar el pautu d’hermanamientu ente tribus tresmontanes y cismontanes. A les 13.30 hores va tener llugar un pasucais de guerreros astures que de desplacen al picu L’Hornón de Faro pa impedir el pasu de les tropes imperiales pelos valles de l’Asturies tresmontana. Llueu, pa garrar fuercies, a les 14.30 hores va tener llugar una xinta con una paella como protagonista.
 
Yá de tarde, a les 17 hores, van celebrase los xuegos astures, va contase la historia de la tribu (18.30 hores) y va representase un casoriu astur (20.30 hores), al que va siguir un ritual de fertilidá con música y bailles. A les 21.30 hores va celebrase la gran Nueche Astur cola actuación de La Bandina pa, tres facer un llamáu a la batalla al traviés de la guerrera Imborg, continuar cola folixa con los alemanes Skalden, Skama la Rede y Spanta la Xente.
 
La última xornada, día de la batalla, les tropes romanes van entrar nel pueblu a les 13 hores, anque enantes, al meudía, Atia, madre de César Augusto, va dir a Carabantius pa inaugurar la villa nueva. Tres una invocación a los dioses por parte de los astures, la batalla va principiar a les 14 hores nel prau de la parte alta del pueblu, resultando vencedores los romanos, qu’a les 15 hores van celebralo con una fabada.
 
A les 16.30 hores va tener llugar una exhibición de les táctiques y téuniques de combate romanes y, una hora más tarde, va recibise al César nel pueblu, actu tres el que va haber delles celebraciones, entes les que destaca’l vuelu del águila de la victoria (19.30 hores). Pela nueche, a partir de les 22.30 hores, la orquesta Tequila va poner l’animación, pa pesllar esta edición del Festival Astur-Romanu de La Carisa a les 00.30 hores con un espectáculu de música y fueos artificiales nel que va poder disfrutase de la otra gran novedá del eventu: l’estrenu d’una banda sonora propia que representa el rumor de la batalla ente astures y romanos fecha n’esclusiva pa la folixa ḷḷeniza pol compositor Mariano Lozano.