Cano, vaqueira d'honor

La presidenta de l'Academia de la Llingua Asturiana recibe esti honor el domingu nel LVIII Festival Vaqueiro y de la Vaqueirada xunto a Javier Fernández, ente otros.

El certame que tien como llugar de celebración la braña d'Aristébanu y el casoriu vaqueiro como actu central va principiar al meudía cola reunión de la caravana oficial, que va salir media hora más tarde colos novios Claudio Riesgo, de Valdés, y Sandra Rubio, de Salas. Los vaqueiros y vaqueiros d'honor van acompañar el cortexu nupcial hasta'l puntu onde va celebrase la boda a les 13 hores.

Yá de tarde, a les 16.30 hores, va tener llugar el LVIII Festival de Folclore Vaqueiro, onde va entregase, ente otres actividaes, los diplomes a los nueve vaqueiros y vaqueires d'honor d'esti añu, ente los que tán Ana María Cano y el presidente Fernández. Completen los gallardonaos, l'abogáu Francisco Ruiz Cubero, l'atleta David Fernández Fernández, l'empresariu Manuel López Dabaliña, el médicu traumatólogu Ángel del Couz, el caderalgu de Derechu Constitucional de la Universidá d'Uviéu Ignacio Villaverde, el Cuarteto Torner y la Comunidad Vecinal de Candelario (Salamanca).