Cano recuerda que la falta d’oficialidá ta “nel tresfondu” de la situación “llamentable” del idioma na estaya educativa

La negativa del ministeriu de crear la especialidá docente y la propuesta de la conseyería pal currículu de Secundaria y Bachilleratu alarmen a l’Academia de la Llingua Asturiana (ALLA). La presidenta Ana María Cano, que va aconceyar con Podemos a pidimientu d'esta formación, apunta que la falta d’oficialidá ta “nel tresfondu” d’esta situación “llamentable” y esixe a los partíos políticos posicionase a favor d’esti marcu xurídicu pa nun condenala al so desaniciu.

El primer tema que trató Cano na so convocatoria a los medios de comunicación foi’l de la especialidá, refugada pol Ministeriu d’Eduación, Cultura y Deporte abellugándose na falta de oficialidá “magar cuente con una enmienda del propiu Conseyu Escolar del Estáu que reclama tal posibilidá”, pero ensin escaecer la responsabilidá que tien el Gobiernu d’Asturies nesti asuntu por “nun negociar al máximu nivel les condiciones de la petición”. Darréu, refirióse a la “inxustificable y allegal propuesta” de la conseyería “p’allugar l’asignatura ‘Llingua Asturiana’ dientro de la Eduación Secundaria nunes condiciones d’optatividá –y competencia desigual– con 4 materies: Segunda Llingua Estranxera, Cultura Clásica, Aniciu a l’Actividá Entamadora y Empresarial, y materia propuesta pol centru docente”. Nesi sen, recordó que “esto incumple dafechu l’artículu 10 de la Llei d’Usu del Asturianu”.

La presidenta de la institución académica, pa siguir, calificó de “risible y insultante” la decisión “de camentar que l’asturianu pue deprendese nel Bachilleratu rebaxando de 4 a 1 hora selmanal la so docencia nunes condiciones d’axuste, amás, práuticamente imposibles pal alumnáu”. Xosé Antón González Riaño, vicepresidente de l’ALLA, esplicó que tres la presentación d’esti borrador, el Gobiernu va dar el pasu d’aprobar esti decretu de Secundaria p’adaptar los estudios a la Llei Orgánica de Meyora de Calidá Educativa (LOMCE), yá en furrulamientu en primeru, terceru y quintu de Primaria, pal cursu viniente. Nesi sen, señaló que los borradores anteriores que manexaba la conseyería yeren “téunicamente más defendibles” y nellos “la posición del asturianu ocupaba otro llugar. Por tanto, nun hai nenguna cuestión fatídica pa que tenga que ser esto llamentablemente pola LOMCE… Non, ye una cuestión d’axuste que tien en cuenta directrices de tipu educativu y políticu del Gobiernu d’Asturies”.

“La posición de l’Academia, porque la Llei Wert lo permite, ye que, como mínimo quedara exactamente igual que ta en Primaria, onde la Llingua Asturiana compite sólo con Cultura Asturiana”, añadió Cano. Mentes, González Riaño defendió darréu la especialidá por ser “un elementu d’organización positiva pal sistema educativu porque munchos profesores con capacidá académica tán yá dientro del sistema y sería rentable dende’l puntu de vista organizativu y económicu pal Principáu d’Asturies”.

Negar la oficialidá ye condenar al idioma

“L’Academia entiende que nel tresfondu de toa esta llamentable situación ta la testona realidá de que l’asturianu ye la única llingua del Estáu español non oficial. Esto nun almite duldes. De fechu, cuando’l ministeriu refuga la especialidá pon como xida que l’asturianu nun ye oficial; y asina mesmo cuando la conseyería nun ye a alcontrar el llugar qu’a la Llingua Asturiana-y correspondería nun currículu normal pa una comunidá billingüe, el problema, na práutica, vien a ser exautamente’l mesmu”, afirmó Cano.

Dende l’ALLA critiquen que n’Asturies “intenta facese daqué imposible, xurídica y socialmente: caltener una llingua y una cultura al marxe del marcu constitucional de referencia que ye la oficialiciación”, un camín que siguieron el restu de territorios con llingua propia del Estáu. “Les llingües que nun son llingües cooficiales nun esisten”, insistió la presidenta, y les coses que se llogren ye “depués de munchu trabayu” y dependiendo de “la bona voluntá” de les persones responsables nesi momentu. Por esti motivu, dirixóse a les formaciones polítiques, a les puertes de la convocatoria d’eleiciones a la Xunta Xeneral, afirmando que “tienen que ser conscientes” de que si nun planteguen y negocien la cooficialidá de la llingua asturian “tán condenándola conscientemente a la so desapaición. Yá nun valen más vueltes nin más ambigüedaes: o se ta cola llingua y la cultura d’Asturies o se ta por facela desapaecer”.

La postura de Podemos

A una entruga d’Asturies.com sobre qué opinión-y merez a l’ALLA la postura que ta calteniendo Podemos al respeutu de la oficialidá, Cano adelantó qu’ayeri recibiera una carta de la organización pa caltener una xunta nos díes próximos “pa falar d’esti tema xustamente”. “La posición de Podemos con respeuto a la cuestión llingüística nun ye clara y, dende llueu, ye reiteradamente ambigua. Eso ye preocupante nuna fuercia política que quier trabayar por rexenerar la vida política, social y cultural n’Asturies. Anuncies previes y procesos previos de Podemos son preocupantes”, añadió González Riaño.  “Nun entendemos que se trabaye nesi terrén si nun avanzamos hacia la oficialidá”, finó la presidenta de la institución académica.