Cano plantega a les fuercies polítiques un procesu d’oficialización “axustáu a les necesidaes d’Asturies" nel que l’ALLA actuaría de moderador

“¿Daquién con xacíu pue dexar pasar esta oportunidá y refugar esta ufierta?” entrugóse Ana María Cano, presidenta de l’ALLA, nel actu académicu del XXXVI Día de les Lletres Asturianes depués d’ufrir a los partíos moderar un procesu d’oficialización de l’asturianu “axustáu a les necesidaes d’Asturies”. Enantes, alredor de 3.000 persones pidieron la oficialidá peles cais d’Uviéu.

La coincidencia de la xornada col entamu de la campaña eleutoral pa les Nacionales y municipales del 24 de mayu condicionó’l discursu institucional de Cano que, tres emponderar el llabor de la Xunta pola Defensa de la Llingua Asturiana (XDLA) –coleutivu que recibió un reconocimientu por parte de l’Academia de la Llingua Asturiana (ALLA)– y facer un repás al llabor académicu nestos doce meses últimos, refirióse a esta cita coles urnes como “una oportunidá pa la llingua asturiana”. “En 15 díes, el 24 de mayu, celébrense les eleiciones pa escoyer la composición de la Xunta Xeneral del Principáu y, darréu d’ello, el Gobiernu d’Asturies. Y ye equí onde se xuega’l futuru del asturianu porque, a lo cabero y práuticamente, ye’l parllamentu asturianu, y non otres instancies europees o estatales, el que decide qué facer cola llingua hestórica d’Asturies”, señaló.

Tres recordar la “más inequívoca neutralidá política” de la institución que preside, calcó en que “la llingua asturiana nun pertenez a nengún partíu, nin a nenguna ideoloxía concreta, sinón que ye patrimoniu común de tol pueblu asturianu”, arracando los aplausos de los presentes. Darréu, afaló a los partíos polítiques a que dexaren nidio “qué política llingüística proponen” y apuntó “que la oficialidá ye absolutamente necesaria pa tener dalguna oportunidá de salvar al idioma”, amás de la “única solución constitucional posible”. La falta d’esi status xurídicu lleva “a que’l Ministeriu d’Educación nun considere la necesidá de reconocer la especialidá docente de llingua asturiana al profesoráu, o que la presencia del área d’asturianu nel currículu d’Asturies seya llamentable, o que nun sintamos programes informativos n’asturianu na Televisión del Principáu o que l’asturianu malpenes tenga valir na vida cultural, institucional y política d’Asturies”, enumeró Cano pa esplicar les consecuencies de la non reconocencia del idioma. “Por eso ye importante conocer y entender qué propuestes de política llingüística nos planteguen pa les próximes eleiciones les fuercies polítiques que s’asitien n’Asturies, les nueves y les vieyes. En tou casu y como viemos, refugar un futuru xurídicu d’oficialización pal asturianu siempres será ‘vieya política’, la política que vien faciéndose n’Asturies dende va 40 años”, continuó.

Sobre la situación depués del 24 de mayu, la presidenta de l’ALLA, entrugóse “¿queremos dignificar una cultura asturiana que seya una aportación orixinal a la cultura universal, sí o non?, ¿queremos que l’asturianu sobreviva ente les nueves xeneraciones d’asturianes y asturianos, sí o non?, ¿queremos qu’Asturies tenga les mesmes oportunidaes que’l restu de comunidaes billingües del Estáu, sí o non?”. Nel casu de la que respuesta sía afirmativa, “sedría inconcebible lo contrario”, añadió, “la consecuencia lóxica ye la necesidá del algame d’un gran consensu social y políticu al rodiu de la co-oficialidá de la llingua asturiana”. Pa ello, Cano ufrió a les fuercies polítiques l’Academia “p’actuar como moderadora nel procesu d’oficialización, dende les primeres fases (concretar la formulación espresa) hasta les caberes (llei de desarrollu y puesta en práutica gradual). ¿Daquién con xacíu pue dexar pasar esta oportunidá y refugar esta ufierta?, ¿por qué diba facelo y actuar contra Asturies?, ¿cómo xustificar un despreciu asemeyáu al espíritu del nuesu pueblu?”.

Nesi sen, puntualizó que la institución “sabe cómo se pue facer esti procesu; sabemos que la oficialidá del asturianu nun tien por qué reproducir miméticamente les soluciones que se dieron n’otres comunidaes, sinón qu’ha afayase a la nuesa y concreta especificidá: la nuesa situación sociollingüística y los niveles de pervivencia de la llingua; les actitúes, demandes y espeutatives sociales; la rellación ente llingua y cultura asturianes; fases d’una puesta en práutica prudente y aceutable; y hasta la necesidá d’una contención económica y presupuestaria. Ye dicir, tien que dase una oficialidá axustada a les necesidaes y posibilidaes d’Asturies, pero oficialidá”.

Reconocimientu a la XDLA

L’actu académicu dio entamó pasaes les 20.30 hores cola presencia de muncho públicu y representantes de tolos partíos parllamentarios a esceición d’UPyD. Destacó l’asistencia de Cristina Coto, cabeza de llista de Foro a la Xunta Xeneral, acompañada pol senador Isidro Martínez Oblanca, l’edil uviedín Juan Pérez Zaldívar, el candidatu al Conceyu d’Uviéu Godofredo Andrés Rodríguez y Inaciu Iglesias, ente otres persones d’esta formación. Por Izquierda Xunida tamién tuvo’l so candidatu  a la presidencia del país y diputáu nel Congresu Gaspar Llamazares, amás del coordinadora xeneral Manuel González Orviz y dellos parllamentarios, protagonizando la coalición la representación más amplia.

Del partíu del Gobiernu acudió la diputada Pilar Alonso, ente otros, y representando a la Conseyería d’Educación, Cultura y Deporte, la direutora xeneral de Política Llingüística, Ana María Fueyo, mentes que pol PP asistió la parllamentaria Susana López Ares y Inmaculada González, teniente alcalde d’Uvieú. De les formaciones ensin representación na Xunta Xeneral destacó la presencia del cabeza de llista de Ciudadanos, Nicanor García, y de la eurodiputada de Podemos Estefanía Torres y de Xune Elipe, miembru del Conseyu Ciudadanu de Podemos Asturies. Tamién se dexaron ver los alcaldes de Nava y Bimenes, Emilio Ballesteros (Asturianistes por Nava) y Alejandro Canteli (Bloque Independiente de Bimenes). El rector de la Universidá d’Uviéu, Vicente Gotor, y dellos vicerrectores y profesores nun quixeron perdese l’actu académicou, amás de munchos representantes del mundu sindical. De fuera d’Asturies, participaron Francisco Venâncio, de la Camâra Municipal de Miranda de l Douro y Alfredo Cameirão, vicepresidente de l’Associaçion de la Lhengua i Cultura Mirandesa.

La puesta n’escena estrenada l’añu pasáu modificóse en dellos aspeutos, principiando l’actu con un entamu musica protagonizada pola gaitera Andrea Joglar dende un palcu del Campoamor. Darréu, los presentadores Sonia Avellaneda y Próspero Morán dieron pasu a los académicos, qu’entraron pela puerta central del teatru ente los aplausos del públicu pa llueu ocupar les silles instalaes nel escenariu. El siguiente en xubir al mesmu foi Carlos Pulgar, voceru nacional de la XDLA, que recibió un presente conmemorativu de manes de Cano. Na so intervención, Pulgar señaló que “ye un honor bien emocionante pa la Xunta recibir esti reconocimientu de la máxima institución llingüística d’Asturies y ye una obligación compartilu con tola xente que sofita les nuestres acciones y actividaes. Pero ta claro que pa nós tamién ye una responsabilidá y un compromisu pa siguir nel llabor y na llucha. Responsabilidá y compromisu qu'acoyemos y aceptamos ensin duldar”.

Darréu, apuntó que “el fin y oxetivu de la Xunta pola Defensa de la Llingua Asturiana namás ye ún: asegurar la sobrevivencia del asturianu. Y p'asegurar un futuru al nuestru idioma son imprescindibles y necesaries una riestra de ferramientes. Ente elles dalgunes son xurídiques. La oficialidá ye una d'eses ferramientes llegales: el reconocimientu esplícitu de la igualdá de la ciudadanía a tolos niveles use la llingua qu'use. Esos derechos de les persones que falen asturianu nun puen ser negociables porque son derechos humanos básicos. Nun hai horizonte de futuru viable ensin aplicar lo que les disposiciones constitucionales estatales y internacionales afirmen. Les llingües, y l'asturianu ye una d'elles, tienen que ser oficiales pa poder sobrevivir. Nun hai espaciu pa interpretaciones, sides o estratexes electorales: ye la manera inequívoca d'asegurar los derechos dientro del ordenamientu xurídicu nel que tamos”. Sicasí, recordó que la oficidalidá “nun ye la solución a too. Ye'l primer pasu. Ye'l pasu inescusable pa entamar un plan de normalización qu'intente salvar la nuestra llingua pa les xeneraciones futures d'asturianos y asturianes”.

El representante de la XDLA llamentó’l dañu yá fechu pol frayíu de la cadena de tresmisión xeneracional pola situación del sistema educativu y la falta d’enfotu puestu dende los medios de comunicación públicos, “ferramientes más eficaces al serviciu de l'aceleración brutal de la sustitución llingüística”, por mor de que los que teníen nes sos manes tornar “esi procesu de sustitución llingüística, pasaron de la negación del fechu llingüísticu asturianu a la corrección política más pegañosa y mentirosa: la de la difusión, la protección, la promoción... Eses sí que son palabres baleres. Son cada añu menos de lo mesmo, como pudimos ver nesta llexislatura llamentabe qu'agora acaba. Ye aprobar topónimos que depués l'Alministración nun usa. Ye xestionar una enseñanza que dexen morrer añu a añu. Ye subvencionar llibros pa una población que desconoz la so existencia. Ye querer muncho l'asturianu una selmana al añu y depués nun volver a alcordase d'ello”, criticó.

“Revélase asina, nos más de los dirixentes que sufrimos estos años, la concepción museística y folclórica que tienen del idioma, que ye calcada, tan progres ellos, de la concepción tardofranquista, que munchos nin saben nin quieren superar”, continuó, pa depués confirmar que la XDLA va siguir siendo l’altavoz de la “otra Asturies”. “El llabor académicu ye un exemplu d'esa Asturies que trabaya pol asturianu, que lo estudia y lo investiga, que lo prestixa y visibiliza, que nos da ferramientes pa proyectalo al futuru. Nós, na Xunta pola Defensa de la Llingua Asturiana, tamién quiximos dar voz a esa otra Asturies, sacar l'apreciu y l'arguyu de falar n'asturianu a les cais, esparder el convencimientu de qu'una Asturies que reconoza derechos, que respete la so llingua, va ser una Asturies meyor con un futuru meyor”, prosiguió, y nesi llabor “vamos tar siempre hasta que s'asegure la sobrevivencia del asturianu. Nesi llabor vamos tar impulsando la revolución democrática y de derechos que supón la oficialidá y el futuru pol que naguamos”.

El tramu final del actu académicu, tres estes pallabres de Pulgar y el discursu de Cano, consistió na llectura d’una esbilla de poemes de ‘Lliteratura 31’, a cargu d’Avellaneda y Morán, y l’actuación d’Al Son d’Amieva. El grupu lideráu por Xuacu Amieva y formáu por Flavia, Vérbal y Paula Amieva, interpretó ‘El pastor’, ‘Xunci les vaques Ramona’, ‘Nalón’, ‘El besu’, ‘Muñeira d’El Reboḷḷal’ y ‘Xota de Tinéu/Muñeira de Xixón’. Pa finar, Amieva y Joglar tocaron a la gaita l’himnu d’Asturies.

Manifestación multitudinaria

Una hora enantes del actu académicu salía de la Estación del Norte d’Uviéu la manifestación ‘L’asturianu, llingua oficial’ entamada pola XDLA, que cifró en 3.000 los participantes. Muchos partíos políticos, sindicatos y coleutivos sofitaron la manifestación, llevando pancarta tres la banderona d’Asturies, la Bandona pola Oficialidá y el baberu principal de la XDLA, ‘Reciella. Families pol Asturianu’; Xunta Moza; CC OO Enseñanza; Izquierda  Xunida; un grupu de falantes de gallego-asturiano; Andecha Astur; SUATEA; Iniciativa pol Asturianu; MAS Corvera; el bloque soberanista promocionáu dende l’Espaciu La Llegra; FETE-UGT Asturias; CSI; Juventudes Comunistas; Marches de la Dignidá; y Ganemos Avilés. Pese a la coincidencia col mítin d’aniciu de campaña de Podemos Asturies en Xixón, acudieron a la manifestación la eurodiputada Torres; el secretaríu xeneral Daniel Ripa; la númberu dos na llista a la Xunta Xeneral pela circunscripción central Lucía Montejo; Andrés Ron, númberu ún na occidental; y Elipe, ente otros. Na marcha pudieron vese, amás de decenes de banderes asturianes, otres de países como Lleón, Canarias o Portugal.

Na puerta del Campoamor, María Xosé Martínez encargóse de lleer un discursu nel que criticó a los políticos asturianos por “mirar a otru llau, dar llarges” nel tema de la llingua. “Nun entendemos que lo que val en Galicia, País Vascu, Cataluña, Valencia, Baleares y Navarra nun val n’Asturies. Los derechos llingüísticos, los derechos culturales, los derechos humanos, parez que dependen del sitiu onde se naz; namás val con cruciar la ría del Eo pa velo”. La situación de precariedá de los trabayadores de los servicios de normalización llingüística o los maestros d’asturianu foi denunciada pola representante de la XDLA, que fixo referencia darréu pa la esperanza les pallabres de Nico y Enol, alumnos del institutu de Los Barredos, pidiendo proteición pal idioma nel actu institucional del martes na Xunta Xeneral y entrugándose qué-yos tendría que pasar pela cabeza de los sos güelos que piensen que ye dalgo malo tresmitir a los sos nietos la llingua propia. Y pal esmolecimientu les del socialista Pedro Sanjurjo, presidente del Parllamentu asturianu. “Contestó-yos que la oficialidá yera una imposición, que les llingües tienen qu’usase y fluir de xeitu natural, pero que la oficialidá xeneraba una confrontación. Parez qu’a los nuestros políticos nun-yos importa lo que pasa pela cabeza de los güelos de Nico y Enol, que representen lo que-y pasa a bona parte de la sociedá asturiana. Nun quieren una Asturies arguyosa de lo que ye; nun quieren una Asturies que nun agache la cabeza; nun quieren una Asturies con alma; nun quieren una Asturies con identidá; nun quieren una Asturies con llingua asturiana. Nun quieren a esti pueblu”.

Xugando col lema de la XXXVI Selmana de les Lletres Asturianes, ‘Semar palabres, texer futuru’, la XDLA entrúgase cómo quieren facelo con una presencia marxinal na escuela, ensin programación infantil n’asturianu y ensin oficialidá nin “una política llingüística amañosa”. Tamién hubo pallabres pa la situación de la toponimia y un mensaxe pa les fuercies polítiques que se presenten a les eleiciones pa que tengan en cuenta l’idioma y qu’ésti nun siga condenáu al desaniciu. Por último, Martínez confirmó que la xente del movimientu de reivindicación llingüística va siguir “plantando cara a los que nos nieguen derechos y lluchando polo que creemos y queremos”.