Cano: “El presupuestu de l’ALLA torna a cifres del añu 1997”

El recorte previstu pola Conseyería de Cultura y Deporte reduz la partida destinada a l’Academia de la Llingua Asturiana (ALLA) “nun 27 por cientu”. Pa la so presidenta, Ana María Cano, ello supón tornar “a cifres del añu 1997”.

La cantidá esacta que, de nun haber cambios, va recibir la institución académica ye de 167.900 euros, 62.000 menos que l’añu pasáu. “Ye una cantidá mui grande pa l’ALLA y, dende llueu, va repercutir d’una manera mui negativa en tol facer de l’Academia”, anuncia Cano, que recuerda que yá veníen trabayando con “unos presupuestos mui axustaos y mui curtios, que tuvieron durante bastantes años conxelaos”. Por esti motivu, dao’l descensu del 27 por cientu previstu, “el presupuestu de l’ALLA torna a cifres del añu 1997”.

“Ye una situación mui fastidiada; un palu mui gordu al facer académicu”, continúa Cano, qu’espera qu’esta situación “se pueda iguar de dalguna manera”. De nun ser asina, “l’ALLA va tener que prescindir de munches coses”, yá que “un recorte del 27 por cientu sobre los presupuestos de l’Academia ye una cantidá sustancial mui importante que, dende llueu, nun nos va permitir siguir con tol trabayu que tenemos”. La estaya que más se va a ver afeutada por esta situación va ser la de les publicaciones, impiendo asina l’oxetivu marcáu pola ALLA d’espublizar toles obres ganadores de los sos concursos del 2011 y dalguna que quedaba pendiente d’años anteriores. “Hai qu’atender otres cuestiones prioritaries como ye’l personal que ta na Academia, el gastu del Día de les Lletres, la UABRA o les Xornaes d’Estudiu, pero aparte d’eso nun sé si podremos facer dalguna otra cosa”.

Más castigu

Pese a que la mengua nos presupuestos en Cultura y Deporte ye d’un 28 por cientu, cifra paecida a la que sufre l’ALLA, Cano puntualiza que “recortar a l’Academia de la Llingua Asturiana’l presupuestu que tien, que ye un presupuestu completamente axustáu, ye dalgo mui grave porque yá tuvimos castigaos económicamente n’años anteriores. Ye una cantidá mui importante pa nós. Habrá otres instituciones y organismos que tenían un presupuestu más axustáu a la realidá. Dende llueu, el nuesu taba mui por debaxo de lo que ye’l desendolque normal d’una academia”.