Cangas va dar la posibilidá d’agospiase nun castru

El conceyu del occidente prepara dellos proyectos sobre la cultura castreña, ente los que rescampla la creación d'un albergue cola tipoloxía d'un castru.

La Conceyalía de Desarrollu Local, Turismu y Festeyos del Conceyu de Cangas del Narcea llevó al plenu d'abril una riestra d'actuaciones pal so desarrollu al traviés de les llinies de financiación p'acciones non productives del PRODER Altu Narcea- Muniel.los ente les que llama l'atención la redacción d'un proyectu técnicu pa un albergue castreñu y la recuperación básica del castru de Tremáu Carbachu.

La redacción del proyectu técnicu del "albergue castreñu" va facese per aciu d'un concursu d'idegues que desarrolle'l conteníu y diseñu xeneral d'un albergue al usu pero cola ambientación d'un pobláu de l'Asturies castreña. La idega ye que l'albergue valga pal usu de colonies escolares o grupos de montaña, sector nel que Cangas nun tien ufierta, enxertando amás nel espaciu instalaciones de conteníu museísticu y talleres, capaces d'espeyar los instrumentos y preseos de la vida na edá del fierru. La parte de Sierra ye onde seguramente se lleve'l proyectu a la realidá.

Xunta ello, el castru de Tremáu Carbachu va beneficiase d'un proyectu de remocique que va consistir nun estudiu topográficu del yacimientu, sondeos pa dar cola so datación y l'afitamientu y restauración del yacimientu amás de la creación d'un recorríu pel mesmu.