Cangas del Narcea y Corvera protagonizaron les sorpreses na constitución de los conceyos asturianos

Los conceyos asturianos constituyéronse esti sábadu, un día en que l'alcuerdu ente PSOE y IX-BA-LV valió pa que se confirmaren un total de 52 conceyos pal PSOE y 7 pa IX-BA-LV, unos númberos que nun se correspuenden colo que tendría de ser sobre'l papel, nel qu'IX namás tendría de tener 6 alcaldíes. La sorpresa llegó en Cangas del Narcea, onde los conceyales del PP votaron a favor de la investidura como alcalde de José Manuel Martínez, cabeza de llista d'Izquierda Xunida y quien, acordies col pautu ente IX y los socialistes, tenía de dar el preste colos sos votos a la investidura del candidatu del PSOE, el veteranu José Manuel Cuervo, que fuera'l más votáu nes elecciones.

La sorpresa foi grande, más pa con ello cuando Cuervo, alcalde de Cangas dende 1979, garrare la selmana pasada'l cargu de presidente de la Federación Asturiana de Conceyos.

IX-BA-LV presentare independientemente'l so candidatu a l'alcaldía dempués de francer negociaciones colos socialistes poco enantes de la sesión d'investidura. Darréu de que los trés conceyales d'izquierdes votaren por Martínez, los seis del PP votaron tamién pol representante d'IX-BA-LV, una decisión cola que nun se contaba y que'l popular Manuel Rodríguez Blanco xustificó poles irregularidaes urbanístiques de Cuervo na ultima llexislatura. Cola so decisión, el PP de Cangas daba un ximielgón políticu de consecuencies imprevistes incluso pal mesmu nuevu alcalde, que declaró darréu de ser nomáu que contaba con ocupar el cargu transitoriamente y con poder llegar a un alcuerdu col PSOE pa que gobernare Cuervo. Dende Uviéu, la dirección d'Izquierda Xunida emitió poco dempués una nota na qu'alvertía de la espulsión de los trés conceyales del so partíu en Cangas por faltar a los alcuerdos col PSOE. Una segunda nota de l'agrupación de Cangas d'IX prometía pa esti llunes la dimisión de Martínez del cargu d'alcalde.

Los votos del PP diéron-y l'alcaldía al candidatu del PSOE en Corvera

La otra sorpresa de la xornada foi la del socialista José Luis Vega, que llogró l'alcaldía de Corvera gracies al sofitu de los conceyales del PP, que d'esta miente torgaba l'accesu a l'alcaldía de Luis Belarmino Moro (USPC), que fuera'l candidatu más votáu y que gobernare col sofitu del PP los últimos 4 años. El triple sofitu de PP, IX y del so partíu llogró'l resultáu de 9 votos pa Vega por 7 pa Moro, que quedó fuera de l'alcaldía.