Cangas del Narcea presenta un Plan de Normalización del asturianu

El Conceyu de Cangas del Narcea, al traviés de la Conceyalía de Cultura, va echar a andar el nuevu Plan de Normalización Llingüística del Asturianu 2007-2009. L'oxetivu d'esti plan ye'l de normalizar la Llingua nel ambitu institucional, en cuantes que dende'l conceyu valórase que "l'asturianu ye la llingua qu'utiliza la mayoría de la población del conceyu".

El Plan quier afitar les bases de la normalización social del Asturianu y fomentar el so usu institucional y públicu por parte del Ayuntamientu, lo mesmo que nos medios de comunicación públicos y particulares.
L'usu de la toponimia tradicional, el desarrollu de la información sobre l'asturianu y les actitúes positives hacia l'asturianu, impulsándolu nos ámbitos deportivos, empresariales, culturales y artísticos. Pa llevalu alantre, nel periodu 2007-2009 van llevase alantre actuaciones de rotulación billingüe de toles dependencies del conceyu y la rotulación del cascu urbanu acordies cola toponimia tradicional decretada d'alcuerdu col trabayu de la Xunta Asesora de Toponimia.


L'Ayuntamientu comprometióse igualmente al usu de los topónimos autóctonos de parroquies, poblaciones, llugares, ríos, montes y otros accidentes xeográficos que tengan nome tradicional, faciendo qu'esti apaeza en lletreros de carreteres, señales urbanes, mapes, documentos oficiales y publicidá.

El Plan espeya tamién midíes pa la formación llingüística ciudadana al traviés de cursos. Los ciudadanos van poder usar l'asturianu nes sos rellaciones cola alministración local, y la documentación, como impresos, espedientes, factures o formularios van poder solicitase n'asturianu. De manera inmediata, va desarrollase una campaña de comerciu y hostelería en collaboración cola Rede de Normalización Lingüística nos Conceyos.