Cangas del Narcea prepárase pa La Descarga

Esti vienres comiencen les populares fiestes d'El Carme y La Madalena.

La pólvora va tomar Cangas del Narcea esta fin de selmana, coincidiendo El Carme (16 de xunetu) en domingu, lo que de xuru va atrayer a numberosos visitantes a esta población del occidente del país. Pese a que les actividaes yá entamaron a lo llargo de tol mes, les Fiestes d'El Carme y La Madalena dan comienzu mañana, a les 20 hores, cola llectura del pregón por parte del periodista Juan José Morodo, siendo la pregonera infantil Alba Suárez Boto, a lo que van siguir dellos espectáculos pirotécnicos y el desfile de peñes de la pólvora.

El sábadu al meudía va celebrase la puesta de banderes de les peñes y el desfile de xigantes y cabezudos, mentes que de nueche va tener llugar la primer verbena de les fiestes, con Tekila y Última Legión. Mentes, el domingu, día grande de les fiestes, l'actividá va comenzar con una diana floriada col grupu folclóricu Son d'Arriba, una misa solemne a les 11.30 hores na capiella del Carme, la procesión de xuba y una misa mayor na basílica Santa María Madalena.

El momentu más esperáu va llegar a les 20 hores, cuando la virxe d'El Carme va salir en procesión. Nel momentu nel que la imaxe aporte a la metá de la ponte romana, comenzará La Descarga, un espectáculu únicu nel que mientres más de 5 minutos llanzaránse unos 80.000 cohetes. Pa finar la xornada, Capitol y Waykas protagonicen la segunda verbena.

Les actividaes en Cangas van continuar mientres tola selmana, hasta'l sábadu 22, cuando va celebrase la 'jira' a Santana.