Cándido y Morala ven “oportunismu” n’Izquierda Xunida énte la so condena

Los dirixentes de la Corriente Sindical de Izquierdes (CSI), Cándido González Carnero y Juan Manuel Martínez Morala, calificaron ayeri de "oportunista" la posición d'Izquierda Xunida énte la sentencia xudicial que condena a los dos sindicalistes a trés años de presidiu pola so participación nes movilizaciones del sector naval de Xixón.

Dempués de qu'IX anunciare una riestra de midíes pa llograr la retirada de l'actual códigu penal, Cándido y Morala aseguraron que la coalición d'izquierdes "lleva tiempu gobernando col PSOE y tuvo tiempu de sobra pa facelo enantes de que nos condenaren". Los dos dirixentes de la CSI aseguren qu'IX quier "llavar la cara" nun asuntu qu'aseguren que-yos va costar en términos electorales "sobre too en Xixón onde tol mundu sabe qu'apoyaron al Ayuntamientu que punxo la denuncia". Cándido y Morala tamién refugaron cualquier solicitú d'indultu propuesta pol Conseyeru de Xusticia Francisco Javier García Valledor en cuantes que se declaren inocentes.

D'otra manera, Juan Manuel Martínez Morala tuvo que declarar ayeri nuevamente nel Xulgáu númberu 2 de Xixón por una denuncia puesta por dos policíes nacionales que lu acusen d'un supuestu delitu "contra los derechos de los trabayadores" consistente en trancar con una cadena la puerta de la central de Caxastur en Xixón nel trescursu de les movilizaciones de los empleaos de la caxa asturiana. El dirixente de CSI negó l'acusación anque si reconoció que participare na manifestación de trabayadores de Caxastur y afirmó qu'existe una campaña de "persecución policial" contra elli y el so sindicatu.