Candido y Morala dicen tar preparaos pa dir presos “cola cabeza mui alta”

Los sindicalistes Cándido González Canero y Juan Manuel Martínez Morala fexeron ayeri la so primer participación pública dempués de conocese la ratificación de les sos sentencies a 3 años y mediu de cárcele pol estrozu d'una cámara de vixilancia de tráficu nuna de les movilizaciones de Naval Xixón en marzu de 2005. Nun actu convocáu pola plataforma que pide la so absolución, Cándido y Morala afirmaron tar dimpuestos a dir presos "cola cabeza mui alta" en casu de que'l xuez Lino Rubio decrete'l so ingresu en presidiu.

Más de mil perdones acudieron al actu, en que la plataforma que pide la so absolución entregó énte l'Ayuntamientu de Xixón toles monedes d'a céntimu qu'atropó na so campaña "un céntimu contra la represión" coles que pretende pagar la sanción económica a los sindicalistes. Los mesmos representantes del sindicatu CSI esclariaron que se trataba d'una entrega simbólica en cuantes que nun piensen pagar les sanciones de 2.160 euros y la indemnización al Ayuntamientu xixonés de 5.624 euros. Los sindicalistes acusaron al Delegáu del Gobiernu Antonio Trevín de la so situación, una culpa de la que tamién lleva parte l' Ayuntamientu de Xixón.