Cándido y Morala declaren que’l que salieren de presos foi “un trunfu de toos”

Los sindicalistes de CSI Cándido González Carnero y Juan Manuel Martínez Morala dieron ayeri a la puerta de la casa sindical de Xixón les sos primeres declaraciones dempués de salir de la cárcele de Villabona al concedése-yos el tercer grau penitenciariu. Los dos sindicalistes presos polos estrozos materiales causaos nes movilizaciones del sector naval recibieron el saludu d'amigos y simpatizantes yá na mesma puerta del centru penitenciariu y tamién a la so llegada a Xixón, onde los esperaba, ente otros l'históricu fundador del sindicatu CSI, Luis Redondo.

Cándido y Morala agradecieron les muestres d'apreciu y aseguraron que'l que salieren de presos foi "un trunfu de toos" y "el resultáu de la presión social".

Los dos sindicalistes, que d'agora en p'alantre van tener que pasar una vegada a la selmana pela cárcele de Villabona, tán a la espera del resultáu de les piticiones d'indultu que tán formulaes y del recursu d'amparu puestu nel Constitucional contra la sentencia que los condenare. Los políticos del equipu de gobviernu de Xixón, Paz Fernández Felgueroso y Jesús Montres Estrada foron otra vegada'l puntu de les crítiques de los dos sindicalistes, la primera por tar tres de la denuncia y el segundu por dar por seguro que nun diben dir presos, amás d'echá-yos en cara'l prometer que diben facer tolo posible pola so llibertá cuando "foi'l mesmu organismu d'Instituciones Penitenciaries el que se decató de que nun pintabemos nada na cárcele y decidió tramitar el tercer grau".

En cualquier casu, pa Cándido y Morala'l dañu ta fechu pero non tanto a ellos mesmos como "a los derechos y llibertaes de los trabayadores ya qu'hasta agora nun hubiera presos por motivos llaborales". Dempués de 19 díes presos, Cándido y Morala tuvieron palabres pa referise a la vida que llevaron dientro de Villabona, onde esplicaron que conocieron casos de xente mui mozo con condenes descomanaes por cuestiones de droga que-yos dexaron muncha tristura.