Candás disfruta un añu más col teatru costumista

|
Presentación del XXVIII Salón de Teatru Costumista Asturianu de Candás

Represéntense doce obres nel Prendes.

El XXVIII Salón de Teatru Costumista Asturianu de Candás yá ta en marcha. Ayeri arrancó oficialmente cola estrena absoluta de 'El secretu de les marañueles', de José Ramón Oliva, a cargu del grupu llocal Les Ayalgues, anque'l martes estrenóse con un homenaxe fechu pol Patronatu del Teatru Prendes, con 'El viaje a alguna parte' de Fernando Fernán Gómez, "a toes aquellos actores y actrices que na España de la posguerra percorríen los nuesos pueblos faciendo que, polo menos unes hores, la ciudadanía escaeciera les sos penuries y miseries", esplicó Cecilia Tascón, conceyala de Cultura y presidenta del Patronatu.

Nun va ser la única obra que se pueda ver per primer vegada sobre les tables, yá que La Farola de Xixón representa esta nueche 'Hércules y Agatha. Historia d'un sobresaltu', d'Oliva, a la que van siguir 'Un xinecólogu mui participal', de Carmen Campo, por Santa Bárbara Teatro, de Llaranes (domingu); 'Qué fice yo pa merecer esto', de Carmen López, pol grupu llangreanu Carmen López (llunes); y 'Quién entruga por él', de Luis Barrera y Segismundo Meana, de los uveínos Chanclos Asgaya (martes). Tamién se van llevar a escena 'Nieve en el puerto', pola Compañía Asturiana de Comedias (vienres); 'Superpín', por El Hórreo de Barcia (sábadu); 'Como dos gotes d'agua', pol Padre Coll de La Felguera (miércoles); 'La maldición de la pita roxa', pol San Félix de Valdesoto (xueves 23); 'La difunta y otres yerbes', pol Rosario Trabanco de Xixón (vienres 24); 'Escapa rural', por Carbayín (sábadu 25); y 'Los amores de Ximielga', pol Xana de Perlora.

Toles funciones van principiar a les 23 hores, menos les sesiones de los sábados, cuando va haber como novedá y a pidimientu del públicu, una sesión doble: 20 y 23 hores. El preciu de la entrada ye de 6 euros, de 4 pa les socies y socios del Teatru Prendes, siendo l'apertura de la venta de les mesmes una hora enantes del comienzu de la representación.

Contador Estadistiques