Candás celebra la so nueche folk esti sábadu

El prau Gervasia de Candás yá ta esperando a que llegue'l sábadu pa enllenase de xente nuna de les nueches folk con más solera d'Asturies.

Cola edición d'anguaño yá son ocho les nueche folk que se celebren na capital del conceyu de Carreño. Anque nun pudo mantenese la continuidá a lo llargo d'esos ocho años -torgáronlo problemes col Conceyu- la gana y el trabayu de l'Asociación Xuvenil Trisquel ficieron que la idega nun quedare pa prau, y como yá pasó l'añu pasáu volvamos a tener nueche folk en Candás.

Los grupos que van tocar esti sábadu nel prau Gervasia a partir de les 23:00 hores son Llendes, grupu que da los sos primeros pasos, Corquiéu colos cantares del so discu Salia y completando'l tríu los viaxeros Felpeyu, que lleven un añu caleyando per toa Europa y hasta per Asia, y qu'esti sábadu tienen una de les sos últimes feches n'Asturies nel calendariu de conciertos d'esti añu.