Candás inaugura’l Teatru Prendes 50 años dempués

El conceyu de Carreño celebra güei los 50 años del Teatru Prendes, que vuelve a inaugurase a les 7 y media d'esta tarde de vienres dempués del remocique que se-y dio a lo llargo d'estos meses. Con motivu d'ello va facese una proyección especial pa la que van recuperase un curtiu mudu rodáu na villa nel añu 1910.

El curtiu mudu "Tarde en Candás" rodáu pol fotógrafu Julio Peinado en Candás nel añu 1910, presenta delles secuencies documentales de 30 segundos, les más d'elles de temática relixosa, ente les que figura una salida del catecismu o una procesión de Pascua, amás d'un rollu dramatizáu con actores y que reproduz una escena de cortexu nel parque de Santarrúa. Tres d'esti documentu, va pasase un montaxe en que s'axunten toles apaiciones de Candás nel noticieru documental del franquismu, el famosu No-Do

Darréu d'ello va proyectase la película "Cuando ruxe la marabunta" protagonizada por Charlton Heston y que foi la mesma cola que s'inauguró'l cine Prendes el día d'añu nuevu de 1956. La vuelta a la vida del Prendes supón la recuperación d'un de los pocos cines pequeños que queden n'Asturies.