Candás celebra esti sábadu un Rebolleres Rock que recupera la esencia de la Nueche Celta

Tres años ensin Nueche Celta, Candás torna a celebrar una folixa venceyada a la música asturiana nel prau Gervasia. L’Ensame Xuvenil Trisquel recupera’l Rebolleres, festival de música rock que tenía llugar en setiembre.
 
La Casa del Pueblu de la CNT de Candás acoyó les trés primeres ediciones d’esti eventu que llevaba cinco años ensin celebrase. Agora, el Rebolleres pasa al prau Gervasia pa enllenar de rock asturianu la nueche del sábadu de les fiestes de San Félix con un cartelu que tamién dexa un güecu pa la música tradicional. Les actuaciones van principiar a les 22.30 hores col Grupu de Baille Tradicional San Félix, anque l’apertura del chigre, que va tener precios populares, ta prevista pa les 22 hores.
 
Tres el grupu llocal, alredor de les 23.15 hores, va xubir al escenariu Desakato, banda que ta ganándose un nome a nivel estatal gracies a trabayos como ‘Inercia’, espublizáu esti mesmu añu. Los de Llanera cancien en castellanu, pero siempre incorporen dalgún tema n’asturianu en caún de los sos discos. Darréu va tomar el relevu una formación que xuega en casa: Skama la Rede. La banda nacida nel Cabu Peñes, presente en toles ediciones del Rebolleres, principiará la so actuación a les 00.30 hores y fadrá baillar a los presentes cola so apuesta musical en llingua asturiana. Por último, a les 2.15 hores, llegará la siempre esperada actuación de Dixebra, que debuta nel Rebolleres. Los avilesinos cumplen 25 años y nesta xira tán ufriendo un set-list mui potente nel que nun falten clásicos que presten tanto a los siguidores más veteranos de la banda como a los más mozos.
 
Prada Folk & Rock Festival
 
Esta fin de selmana tamién tien llugar en Santu Adrianu un festival de creación nueva que pon la so mirada nel rock y nel folk: el Prada. Asina, güei va tar dedicáu a los soníos más guitarreros cola presencia de La Cosa Nostra, Flying Padres, N’Ochebre y la Orquesta Naval de los Medios, mentes que mañana'l turnu va ser pa los sones más tradicionales: Tuenda, Bon Tastu, The Gañan’s, La Kuruxa 2.0 y La Tarrancha. Los conciertos van principiar a les 22 hores, anque tán programaes actividaes pel día tanto’l vienres como’l sábadu y el domingu. Hai que destacar que la organización dispón una zona d’acampada llibre a tola xente interesao.
 
XVI Nueche Celta de Granda
 
El domingu va celebrase na carbayarera de Granda una edición nueva de la Nueche Celta. Nesta ocasión, los xixoneses y visitantes van poder disfruta de la música de Zapica, Pelgares y Asturiana Mining Company. L’entamu de les actuaciones ta previstu pa les 21 hores, anque a lo llargo del día va haber delles actividaes, ente les que destaquen los xuegos tradicionales pa neños y mayores, a partir de les 19 hores.