Canal va llevar la historia de los Sidros y La Comedia a la charra mensual d'Ástura

|
Pablo'l Sidru

Esta intervención va poner el ramu a esti cursu de conferencies sobre cultura asturiana nel llar del Atenéu Obreru de Xixón.

Baxo'l nome de 'Sidros y comedies: una tradición ancestral que venció al escaezu', Pablo Canal va falar d'esti viaxe cultural dende'l so orixe hasta los nuesos díes, siendo'l primer documentu recuperáu sobre los Sidros del 1857. "La conferencia va esplicar la evolución de los Sidros y Comedies dende'l so orixe hasta l'actualidá, cola llegada de les nueves teunoloxíes y les consecuencies de la reconocencia de recién", en referencia a la declaración de la mazcara d'iviernu como Bien d'Interés Cultural (BIC), espliquen dende l'asociación cultural Ástura, pa lo que'l convidáu va apoyase de semeyes y documentos de delles époques, dalgunos d'ellos entovía ensin espublizar.

Pablo'l Sidru, como ye conocíu dientro y fuera d'Asturies, va amosar tamién el llabor que se fai dende l'Asociación pa la Recuperación de Los Sidros y Les Comedies ‘El Cencerru’. Ente elles destaca l'entamu del Domingu de Sidros y Comedies y les Xornaes de Mazcaraes d'Iviernu, asina como la participación en congresos y desfiles en Portugal, Italia o Bulgaria, "llevando la cultura asturiana, con muncha brenga, al ámbitu internacional".

La conferencia, con entrada llibre, va celebrase mañana, a les 19.30 hores, nel llar del Atenéu Obreru de Xixón. Con ella va zarrase'l cursu actual de charres d'Ástura, que se va retomar, como ye vezu, n'ochobre.

Semeya autoría y  © de Mercedes Menendez

Contador Estadistiques