Canal: “En Lisboa vendemos Asturies y facemos país; hai que tar equí"

Los Sidros y La Comedia son bien conocíos en Lisboa. Los llugareños busquen a los de Valdesoto en tolos FIMI pa facer una semeya y disfrutar con ellos. Pablo Canal, d’El Cencerru, atendió a Asturies.com na terminal 2 del aeropuertu lisboeta.

¿Qué valoración fai de la vuesa partición nel VIII Festival Internacional Máscara Ibérica (FIMI) qu’entama Progestur?

Una vegada más, l’Asociación pa la Recuperación de Los Sidros y Les Comedies ‘El Cencerru’ vamos mui contentos de la nuesa participación. Tuvimos equí per cuatro díes faciendo animación y la xente quedó bastante contenta. De fechu, la organización ta acabante de dicinos que yá nos conviden pa tornar l’añu qu’entra, polo que pienso que la valoración tien que ser positiva un añu más.

¿Cuántos años lleven yendo Los Sidros y La Comedia a Lisboa?

Ésti ye’l quintu consecutivu. Dende’l 2009 p’acá somos fixos nel festival.

Nesta edición, la octava, la delegación asturiana tuvo un pesu mayor.

Esti añu tuvimos una mayor representación institucional. Nós, dende qu’entamamos esti proyeutu, nel añu 2009, siempre tuvimos detrás de que nos acompañaren les instituciones. Hasta agora yera difícil, pero nesta ocasión tuvo presente l’Ayuntamientu de Xixón, al traviés de Xixón Turismu; el de Cangues d’Onís; y el de Siero.

El FIMI de Lisboa ye un escaparate perimportante p’Asturies.

Sí. Esti desfile hai que venir a facelu; hai que tar equí. Yo pienso que debemos siguir viniendo nos años próximos, sían Los Sidros o otres mazcaraes d’Asturies. Lo que nun podemos facer ye perder el contautu con esta xente, mazcaraes d’iviernu que son igual que nós y que nos xuntamos dos vegaes al añu, en Zamora y en Lisboa. Ésta ye una cosa qu’hai que potenciar y siguir alantre con ello. Amás, cónstame qu’hubo dalgunos contautos a nivel empresarial. Nesi sen, hai coses que funcionen y pese a que nestos tiempos de crisis habrá xente que pensará que tamos equí de folixa, lo cierto ye que tamos vendiendo Asturies y faciendo país, y, si a parte ayudamos a empreses comerciales, meyor que meyor. Y eso tamos faciéndolo una asociación de Valdesoto con poques ayudes. El tar equí supón pa nós un esfuerciu mui grande y prestaríanos tener apoyu d’otres instituciones a parte del Conceyu de Siero, que sí nos ayuda.

¿Cuánta xente calcula qu’acudió a esti certame dedicáu a les mazcaraes ibériques y que pudo tener contautu col nome ‘Asturies’?

Falando cola organización, dixéronme qu’ellos recibíen tolos díes un recuentu por parte de la Policía Llocal y, a día de güei –domingu pela mañana– pasaren pel festival 300.000 persones. La valoración de la Policía nel desfile foi de 70.000 persones.

Los asturianos que nun conozan el FIMI y que puedan tar pensando en viaxar a Lisboa l’añu qu’entra, ¿qué s’atoparán nel festival?

Equí van atopar un montón de coses, dende una serie de mazcaraes tradicionales que nun quieren morrer y que s’alcuentren en Lisboa pa facer xuntanza, a un coloríu y soníu impresionante… Ye un conglomeráu de coses que son úniques n’Europa.

Na semeya, Canal posa xunto a una foto d’él mesmu vistíu de sidru fecha por Miki López pal trabayu d’Asturies Sieglu XXI.