Campelo diz que’l PSOE "taba informáu" de les ufiertes de pagu de comisiones

El xuiciu pol escándalu de les supuestes comisiones illegales del supermercáu que quería abrir en Llangréu la casa Leclerc entamó ayeri n'Audiencia d'Uviéu col exconceyal socialista José Laudelino Campelo como únicu acusáu y con once importantes políticos, empresarios y sindicalistes llamaos a declarar.



L'ex voceru del PSOE nel Conceyu de Llangréu, José Laudelino Campelo, manifestó ayeri que les reuniones que tuvo colos empresarios yeren "sólo pa falar de compensaciones económiques pal Conceyu" y aseguró que "la comisión executiva de Llangréu conocía la información de tolos alcuentros asina como'l 'xefe'" -refiriéndose al Secretariu Xeneral de Soma-UGT, José Ángel Fernández Villa-.

Campelo declaró por más d'una hora, énte'l maxistráu de la Seición Segunda de l'Audiencia Provincial, Julio García-Braga, acusáu d'esixir supuestamente, el pagu de comisiones illegales a la empresa Codema-Leclerc pa facilitar la construcción d'una gran superficie comercial en Llangréu, nes antigües naves de los Talleres d'El Conde.

El fiscal y l'acusación particular exercida pol PSOE pide pal ex dirixente socialista una pena d'un añu y mediu de cárcel por un delitu de sobornu, mientres que l'acusación exercida por IU reclama pa Campelo cuatro años de prisión por sobornu y tráficu d'influeyencies.


L'ex conceyal de Llangréu confesó que s'aconceyó colos representantes de Codema-Leclerc -Pedro Piñera y Juan Pedro Iriazabal-, en cinco ocasiones fuera del Consistoriu pero "sólo pa falar de compensaciones pal Conceyu". Manifestó que Piñera yera'l so collaciu dende hai 20 años y que lu llamó "insistentemente" pa comer xuntos.

Campelo declaró que la única propuesta qu'había sobre la mesa del conceyu llangreanu pa la creación d'un centru comercial en Llangréu yera la del grupu Eroski que "acordó col consistoriu el pagu de 600 millones de pesetes (3,6 millones d'euros) pa que'l conceyu mercara'l suelu y lo cediera al grupu vascu". "El grupu Codema-Lecrec llegó al conceyu'l 11 de xunetu del 2002 con cero pesetes", añadió.