Camiseta nueva pa la selección

Acaba de presentase na sé de la Federación Asturiana de Fútbol la equipación que va llevar la Selección Asturiana Absoluta nel partíu que se xuega'l prósimu día 29 nel Estadiu d'El Molinón contra Arxelia. Esti añu, la equipación faila una empresa asturiana, Joluvi, qu'escoyó un diseñu estremáu del que s'emplegó l'añu pasáu. Col mesmu fondu azul, la mayor novedá na camiseta ye que la banda mariella agora ye horizontal en cuenta de la vertical del añu pasáu. Sobre'l fondu azul van impresionaos nun azul más clarino los nomes de los conceyos asturianos, pero en castellanu, lo mesmo que'l nome del país que sal en grande: "Asturias".