Cambiu na tramitación de les baxes por COVID-19: va encargase l’equipu d’inspeición del SESPA

Les persones que sían positivu confirmáu por PCR van recibir una llamada de los rastrexadores del Serviciu de Salú del Principáu d’Asturies (SESPA) pa confirmar la necesidá de tramitar una baxa llaboral. Búscase asina lliberar d’esti trabayu a los centros de salú, desbordaos estes selmanes d’alta tresmisión del coronavirus.

El SESPA pon en marcha dende güei un procedimientu nuevu pa la tramitación de les baxas y altes llaborales pa casos confirmados de COVID-19. Los sos equipos d’inspeición van encargase d’esta xera.

Toles xornaes van recibir una rellación de los casos confirmaos colos datos identificativos pa validar y tramitar tanto les baxes como les altes. Pela so parte, a los trabayadores va llega-yos darréu un mensaxe de confirmación al so dispositivu de telefonía móvil que confirme que la xestión se fixo con ésitu y nel que se-yos indicará tamién el día de la baxa y de l’alta laboral.

Nel casu de que les persones afeutaes pertenezan a mutualidaes que precisen la realización d’otros partes per aciu del talonariu específicu, el serviciu d’inspeición va remitir los sos datos al centru de salú pa la so tramitación. Mentes, aquellos pacientes que necesiten los sos partes de baxa y alta en formatu papel, nun plazu de 48 a 72 horas van poder unviar a una persona autorizada a recoyelos n’horariu de mañana a la unidá alministrativa del so centru de salú.

Los casos positivos que nun cumplan los requisitos pa l’alta al séptimu día podrán xenerar otra baxa a partir del octavu, siempre y cuando sían pacientes identificaos por un llabor de siguimientu clínicu por parte del personal d’enfermería de los equipos d’Atención Primaria.

Na semeya, Concepción Saavedra, direutora xerente del SESPA, partipa nel aconceyamientu telemáticu xunto colos direutores xenerales de Política y Planificación Sanitarias, Sergio Valles, y d'Emplegu y Formación, Pedro Fernández-Raigoso, con representantes d'UXT, CC OO, FADE y les cámares de Comerciu pa esplicar esti modelu nuevu de tramitación de les baxes.