Camín de Cantares y Sastre lleven los XXVI Premios Andrés Solar

La Xunta pola Defensa la Llingua Asturiana ta acabante de dar anuncia de los ganadores de los Premios Andrés Solar na so XXVI edición. Camín de cantares y Herminio Sastre son les dos cares opuestres premiaes.

Los Premios Andrés Solar algamen la so XXVI edición. Como nos sos 26 años de vida, los premios tienen una vertiente doble. Nel llau positivu, la Xunta premia con El Pegollu a una entidá o persona que rescamplara nel últimu añu pol so llabor en defensa o promoción del asturianu. Mentantu que nel negativu, reconocese-y col “Madreñazu” a la persona o entidá que fixera bultables fechos a la escontra de la llingua.

El programa Camín de Cantares y los sos responsables – n’especial el director, Ramón Lluis Bande, y el conductor, Xose Antón Ambás-, van recibir El Pegollu d’esti añu. Según afirma la Xunta nun comunicáu, les principales razones pa esti reconocimient son “la recuperación de les tradiciones, sobre manera nel ámbitu musical, y too ello cola conducción del propiu programa col asturianu como llingua vehicular”.

“Madreñazu” a Sastre
El Conseyeru d’Educación y Ciencia del Principáu d’Asturies, Herminio Sastre, ye’l que va recibir el “Madreñazu” d’esti añu. La causa principal d’esta negativa distinción ye l’actitú que caltuvo’l conseyeru tres la resolución del Tribunal Superior de Xusticia d’Asturies d’eliminar la ratio mínima d’ocho alumnos pa estudiar asturianu na ESO.

“El nuevu conseyeru d’Educación preséntase en comparecencia pública calificando l'aplicación de la llei como ‘despilfarru’, despreciando’l derechu reconocíu de los estudiantes asturianos a poder estudiar asturianu y anunciando recursu contra la sentencia”, critica la Xunta pola Defensa de la Llingua asturiana na argumentación pa personificar n’Herminio Sastre les actitudes negatives col asturianu mientres el 2010.

Entrega de Premios
La entrega de los Premios va facese’l día 18 d’avientu a les 19:30 hores nel Salón d’Actos del Antiguu Institutu de Xixón. L’actu va contar cola actuación musical de dellos músicos de la escena folk asturiana, que van facer reellaboraciones de temes tradicionales asturianos.

Depués de l’actu va haber una espicha. Esti añu va ser nel chigre xixonés Sidrería Canteli, y la entrada val 20 euros. Pa dir, hai qu’acutar sitiu, y pa ello puedes llamar al teléfonu 985229553 primero d’esti xueves 16 d’avientu.