CaleyAvilés resiste al andanciu con trés salíes programaes esti branu

El guía oficial Denis Soria va encargase de conducir les visites de baldre pel conceyu.

La quinta edición de CaleyAvilés yá ta equí. Esta iniciativa de la Estaya de la Llingua pa dar a conocer n'asturianu dellos llugares d'Avilés resiste a la crisis sanitaria pola pandemia de COVID-19 y programa trés salíes esti añu.

La primera va celebrase'l día 24 y va consistir nuna visita al cementeriu de La Carriona, espaciu creáu a lo último’l sieglu XIX pol arquiteutu Ricardo Marcos Bausá que ta dientro d'ASCE (Association of Significant Cementeries in Europe). La salida ta programada pa les 19 hores dende la entrada del Centru d’Interpretación del Cementeriu.

N'agostu CaleyAvilés va visitar el cascu históricu'l vienres 21 y, en setiembre, Llaranes el vienres 18. Pa participar nestes actividaes, que tán llendaes a 15 persones, ye necesario acutar plaza llamando al númberu de teléfonu 985.54.55.08, al traviés del WhatsApp 634.821.613 o del corréu electrónicu estayallingua@aviles.es.