CaleyAvilés arranca la so cuarta edición con una salida al parque Ferrera

Va tar compuesta por cuatro visites guiaes n'asturianu de xunu a setiembre.

L'actividá CaleyAvilés, que vien entamando la Estaya de la Llingua d'Avilés con ésitu dende'l 2016, vive una edición nueva, que comienza esta tarde con una salida al parque Ferrera. La bióloga Ángeles Rodríguez Tuñón esplicará los usos y creencies qu'arrodien a les especies más presentes na cultura asturiana nun percorríu per esta zona verde.

Asina los presentes van poder ver carbayos, texos, castañales o fayes al tiempu que conocerán lleendes, creyencies y usos asociaos tradicionalmente a caún d'estos árboles. La salida va principiar a les 19 hores dende l'edificiu de La Noria y va tener un llargor d'hora y media, polo que se recomienda llevar calzáu cómodu.

Toles visites son de baldre, pero ye necesario acutar plaza previamente al tar llendaes éstes a 25. El trámite pue facese al traviés del númberu de teléfonu 985.54.55.08 o del corréu electrónicu estayallingua@aviles.es.

La Madalena, la siguiente

La salida del mes de xunetu va ser al parque de La Madalena, guiada tamién por Rodríguez Tuñón, el día 19. El 2 d'agostu va poder conocese n'asturianu'l cascu históricu d'Avilés y el 6 de setiembre'l cementeriu La Carriona y el barriu Miranda, baxo les indicaciones nestes dos ocasiones de Denis Soria.