Caen un 25% les ventes de coches en setiembre

El mercáu automovilísticu español va zarrar el mes de setiembre con una cayida del 25% y un volume de 58.000 matriculaciones, según estimaciones de la consultora MSI pa la Federación d'Asociaciones de Concesionarios de Automoción.

D'esta forma, les matriculaciones de turismos y tooterrenos van atropar trés meses siguíos de descensos, tres los retrocesos próximos al 24% contabilizaos en xunetu y agostu, de resultes del fin del Plan 2000E y de la subida del IVA.
  
Según la patronal de los concesionarios, les ventes de coches a particulares (principal canal del mercáu) van esbarrumbase un 42% en septiembre, siguiendo "la so cayida llibre y asitiándose nel entornu de les 35.400 unidaes".
  
Pela contra,  les ventes a empreses van crecer un 40% en setiembre, con 21.500 matriculaciones. Según Faconauto, trátase d'una "subida ficticia", por culpa de que nel so mayor parte correspuende a automatriculaciones y non a una demanda real.
  
Del so llau, la canal d'empreses d'alquiler va zarrar el mes de setiembre con un volume de 1.223 unidaes, lo que se traduz nuna progresión del 9% en comparanza col mesmu períodu del exerciciu precedente.
  
Faconauto entiende que los datos de les ventes de coches "son bien preocupantes y muestren un mercáu casi paralizáu". Coles mesmes, "destaca que'l datu sería peor si la canal d'empreses nun maquillare" la situación real.