Cadasa úfrese a los conceyos pa xestionar la llegada del agua hasta l'usuariu final

|
Julio Pérez de Cadasa y representantes de Navia, Gozón, Noreña, Siero y Samartín del Rei Aurelio

Navia, Gozón, Noreña, Siero y Samartín del Rei Aurelio van facer auditoríes del serviciu de suministru municipal, tres un alcuerdu col consorciu, pa conocer el so estáu actual.

El Consorciu d’Agua d’Asturies (Cadasa), responsable dende'l 1967 d’ufiertar suministru a los principales conceyos y industries hasta los depósitos municipales –el nomáu suministru n’alta–, avanza nos trámites p’asumir la xestión del procesu hasta llegar al usuariu final, el ciudadanu, lo que se conoz como suministru en baxa. Anguaño nel país esisten dellos modelos pa la xestión del suministru municipal, yá sía que'l conceyu asuma de manera direuta’l serviciu o que lo faiga per una vía indireuta al traviés d’empreses especializaes o de la constitución de compañíes mestes o municipales, y la intención anguaño de la entidá ye ufiertar a los conceyos el control tamién de los mesmos.

Nesti sen, alcordó con cinco conceyos la creación de grupos de trabayu pa redautar los pliegos que van dexar sacar a llicitación auditoríes del serviciu de suministru municipal. Na xunta de la comisión conxunta celebrada ayeri, integrada por representantes de Cadasa y d'estos ayuntamientos, decidióse que la primer llicitación sía la de Noreña, que se va formalizar esti mesmu añu.

Los trabayos de la comisión van siguir cola visita de téunicos del consorciu a los conceyos y la constitución de los grupos pa la redaición de los pliegos. El propósitu de les auditoríes ye conocer l’estáu actual del serviciu de suministru, analizar la xestión téunica y operativa de los servicios y planiar inversiones.

Cadasa ufierta a los conceyos consorciaos una xestión téunica y profesionalizada, de la que desempeña la función de regulador xeneral col oxetivu d’harmonizar los niveles de prestación de los servicios y la tresparencia, buscando siempre la eficiencia y la seguranza xurídica.

Na semeya, el xerente de Cadasa Julio Pérez –cuarto per la derecha– xunto a los alcaldes de Siero, Ángel García; de Navia, Ignacio García; de San Martín del Rei Aurelio, Enrique Fernández; de Gozón, Jorge Suárez; y el conceyal de Medio Ambiente de Noreña, Pelayo Suárez, acompañaos por téunicos del consorciu.

Contador Estadistiques